Levica kërkon reformë të sistemit tarifor: “Elektriciteti është i lirë vetëm në letër, por më së shumti i rëndon xhepit të popullit”

"Në Maqedoninë e Veriut, elektriciteti është i lirë vetëm nëse e shikoni vetëm çmimin nominal të shprehur në euro – atëherë është përafërsisht në nivelin e Serbisë dhe Shqipërisë. Por shumë më e rëndësishme është pyetja sa vërtetë peshon ai elektricitet në xhepin e personit që e paguan. Sipas të dhënave të EUROSTAT për gjysmën e dytë të vitit 2025, kur çmimi i energjisë krahasohet me fuqinë blerëse të popullsisë, Maqedonia ka ngarkesën më të lartë midis vendeve të Ballkanit Perëndimor," tha Levica.

Levica thekson se çmimet nominale nuk reflektojnë kostot reale për familjet dhe i referohet metodologjisë së EUROSTAT që përdor PPS — Purchasing Power Standard (standardi i fuqisë blerëse) për të krahasuar barrën reale të çmimeve duke marrë parasysh ndryshimet në nivelin e çmimeve dhe fuqinë blerëse.

Partia vë në dukje se "100 denarë nuk kanë të njëjtin vlerë për një person me pagë minimale dhe për një person me të ardhura të larta" dhe se çështja kryesore është sa mund të blihet me rrogën që merr secili dhe sa pjesë të buxhetit familjar zë fatura e energjisë elektrike. Në këtë kontekst, Levica kritikon funksionimin e Komisionit Rregullator për Energji (ERC) dhe ndryshimet e shpeshta të rregulloreve dhe modeleve tarifore, të cilat sipas partisë shërbejnë për interesat e një oligarkie politike-energjetike, ndërsa kostoja kalon te qytetarët.

Propozimet për ndryshim të tarifave dhe strukturës së tregut

Levica propozon që blloqet tarifore të mbeten, por të zgjerohet periudha kohore e tarifës së lirë, në mënyrë që energjia më e lirë të bëhet realisht e disponueshme për më shumë familje. Partia kërkon që ELEM Prodazhë të përcaktohet ligjërisht si furnizues universal, me marzh dyfish më të vogël se marzhi aktual i EVN Home prej 9,9%.

"Në vend të një sistemi ku ndërmjetësi privat rrit fitimin e tij në kurriz të qytetarëve, sistemi i energjisë elektrike duhet të vihet në funksion të interesit publik," thotë Levica. Ajo kërkon gjithashtu futjen e një sistemi me tarifa të shumëfishta — dimërore dhe verore — me disa blloqe orare, si dhe një tarifë diellore për të përshtatur prodhimin me kërkesën, për të shfrytëzuar tepricat diellore dhe për të ulur faturat e energjisë.

Sipas Levicës, energjetika nuk duhet të jetë mjet për pasurimin e ndërmjetësve dhe oligarkëve, por sektor strategjik përmes të cilit shteti siguron energji elektrike të përballueshme dhe mbrojtje të standardit të jetesës së qytetarëve.

Foto: material shtypi nga ngjarja