Левица: ДПМНЕ лаже дека ги решија проблемите на струмичките земјоделци – откупувачите сè уште ја диктираат цената

Левица ја обвини владејачката партија дека лажела оти ги решила проблемите на струмичките земјоделци и предупреди дека откупувачите и натаму ја одредуваат цената, додека производителите остануваат ранливи.

„Серафимовски нема со што да се фали и нека не се обидува да им ги мачка очите на струмичките земјоделци со некаков неформален договор со откупувачите. Земјоделците се гневни затоа што се доведени до гола егзистенција, а ова што го нуди Министерството не е никаква системска гаранција. Кој гарантира дека договорените 40 денари за прва класа, 30 денари за мешана прва и втора класа и 15 денари за шкарт навистина ќе бидат исплатени? Кој гарантира дека утре откупувачот нема повторно да ја прекласифицира пиперката и да ја откупи по пониска цена? Никој! Затоа што нема законска одредба што го обврзува да го направи тоа. Државата повторно го остава земјоделецот сам пред откупувачот, иако земјоделецот веќе ги вложил своите пари, труд и цела сезона во тој род“, велат од партијата.

Во соопштението Левица нагласува дека цената на пиперката не беше единственото барање на земјоделците кои излегоа на улица и бара конкретни одговори за неплатените субвенции. Партијата обвинува дека, иако луѓето секојдневно даваат барања во подрачните единици на Министерството за да аплицираат за идната година, тие се испраќаат назад со објаснувањето дека „паднал системот“.

Според Левица, без сигурен пласман и гарантна цена, со целосен товар на производствениот ризик врз рамената на земјоделецот, државната поддршка останува единствената, и таа често се уцврстува преку мерки и фондови кои отвораат простор за криминал и перење пари.

Предлози за законски решенија

Левица предлага воведување законски утврдена минимална откупна цена за сите земјоделски култури, утврдена врз основа на реалните производствени трошоци, потребниот приход за одржување на земјоделското стопанство и разумна заработка за родот. Таа мерка, според партијата, ќе им овозможи на земјоделците уште пред сеидба да знаат дека државата нема да дозволи откуп под цена што ги турка во загуба.

Дополнително, Левица предлага формирање државни откупни центри — јавна инфраструктура каде што земјоделците ќе можат да го предадат и складираат производот наместо веднаш по бербата да бидат приморани да го продадат по најниска понуда. Со такви центри, државата, тврдат од партијата, би стекнала реална противтежа на откупувачите, би обезбедила сигурен пласман, би можела да врши интервенционен откуп и да влијае врз формирањето на фер пазарна цена.

Левица заклучува дека само со законски и инфраструктурни промени може да се заштитат малите производители од регионот на Струмица и пошироко.

Фото: прес-материјал од настанот