Левица ја напушти седницата на Советот на Град Скопје, обвинува Ѓорѓиевски и ДПМНЕ за „режирана претстава“

Советничката група на Левица денеска ја напушти седницата на Советот на Град Скопје како протест против, како што велат, новиот начин на одржување на седниците за советнички прашања.

Пратениците на Левица обвинуваат дека новиот модел ги лишува од можноста за непосредно прашање и соочување со градската власт

Од партијата велат дека со новиот модел советниците се принудени сите прашања да ги постават на почетокот на седницата, а одговорите да ги добијат подоцна, без можност за непосредна расправа и дополнителни прашања до градоначалникот, директорите на јавните претпријатија и установи и градската администрација.

Во соопштението Левица посочува: "Советничката група на Левица денеска беше единствената опозициска партија која ја напушти седницата на Советот на Град Скопје, како протест против новиот начин на одржување на седниците за советнички прашања", и додава дека ваквиот начин на работа го ограничува демократскиот надзор врз градската власт и ја намалува улогата на советниците во барањето одговорност за управувањето со средствата и ресурсите на скопјани.

Од Левица обвинуваат дека начинот на одвивање на седницата се наметнува од советниците на ВМРО-ДПМНЕ и градоначалникот Орце Ѓорѓиевски, без да се земе предвид волјата на Советот како колективно претставничко тело. "Советот на Град Скопје не е продолжена рака на градоначалникот, ниту советниците се статисти во однапред режирана претстава во која власта си ги одбира правилата според сопствените политички потреби", се наведува во соопштението.

Партијата упати и критика до СДСМ, чијашто однесување го окарактеризира вака: "СДСМ како апологети на недемократското дејствување на ДПМНЕ останаа на седницата, со што директно го поддржаа ова кршење на Деловникот".

Левица тврди дека новата процедура овозможува прашањата да се натрупаат, а одговорите да се сведат на однапред подготвени реплики, со што исчезнува можноста за дополнително прашање и непосредно соочување на градската власт со проблемите на граѓаните.

Во завршниот дел од соопштението партијата нагласува дека ќе ги бојкотира таквите обиди за формална демократска процедура: "Левица нема да учествува во симулација на демократија во која Советот треба само формално да поставува прашања, додека ВМРО-вската градска власт си избира кога, како и дали воопшто ќе одговори. Деловникот да се прекршува, а гласот на избраните претставници на граѓаните да се игнорира само за да се овозможи Орце Ѓорѓиевски и ДПМНЕ да ја контролираат и режираат секоја дебата во Советот", и појаснуваат дека напуштањето на седницата е протест против, како што наведуваат, кршењето на Деловникот, деградацијата на улогата на советниците и ограничувањето на правото на демократска контрола.

Фото: Принтскрин