Македонија со највисока стапка на заболени од западнонилска треска во Европа

Според најновиот седмичен извештај на Европскиот центар за превенција и контрола на болести, Македонија има највисока стапка на пријавени случаи од западнонилска треска на еден милион жители во Европа.

Документот бележи 20,3 случаи на еден милион население во земјата; на второ место е Грција со 15,1 случаи, а по неа Италија со 5,3 случаи на милион. Иако во апсолутни бројки има повеќе заболени во Италија, Грција и Шпанија, споредено со големината на државите, Македонија има 1,3 пати повеќе случаи на еден милион жители од Грција, речиси 4 пати повеќе од Италија, 14 пати повеќе од Романија и 23 пати повеќе од Шпанија.

Извештајот опфаќа податоци до петокот, кога биле пријавени 37 случаи; меѓутоа, вкупниот број на потврдени заболени во земјата се искачи на 43.

Смртни случаи и локални мерки

До сега се пријавени 5 починати, што одговара на стапка на смртност од 2,7 на милион жители.

Вчера директорот на Клиниката за инфективни болести, Фадил Цана, објави дека е регистриран петтиот смртен исход: "Станува збор за 73-годишен пациент со тешка клиничка слика и други придружни болести." Починатиот е од населбата Долно Лисиче во Општина Аеродром, една од скопските општини каде е прогласена епидемија на западнонилска треска.

Властите соопштија дека се мапирани 34 ризични точки во скопскиот регион каде се изведува теренско прскање против комарци како дел од мерките за спречување на понатамошно ширење.

Фото: Freepik