Македонски производи на полиците на Lidl во Европа

Производи од македонски компании веќе се на полиците на Lidl во неколку европски земји, што отвора нови можности за извоз, но и ја воведува потребата компаниите да ги исполнат строгите стандарди за квалитет и безбедност за да добијат пристап до пазарот.

Германската амбасадорка Петра Дрекслер неодамна ги посети производствените капацитети на „Бестфуд ТИ“ и „Млекарница Ѓоргиеви“ во Радовиш, каде што двете компании веќе ги пласираат или наскоро ќе ги пласираат своите производи преку мрежата на Lidl.

„Бестфуд ТИ“ соработува со Lidl од 2023 година, произведувајќи производи од цвекло, пиперки и феферони за приватната марка Lidl Freshona; нивните производи досега беа дел од промотивните недели на македонски производи во Бугарија, Словенија, Србија и Хрватска. „Млекарница Ѓоргиеви“ наскоро ќе почне со производство на млечни производи за брендот Pilos, што ќе отвори дополнителен канал за излез на странските пазари.

Барања за стандард и вложувања

Соработката со голем трговски синџир не значи само обезбеден пласман — таа подразбира исполнување строги критериуми за квалитет, безбедност и следливост, поседување соодветни сертификати и редовни независни проверки кои опфаќаат од суровините и условите во производството до финалната контрола на готовиот производ. „Кога домашна компанија почнува да произведува за сопствена марка на ‘Лидл‘, влегува во систем со високи барања за квалитет, безбедност и следливост. Исполнувањето на тие критериуми бара инвестиции и унапредување, но ги прави компаниите поконкурентни и подобро подготвени за европските пазари“, вели Стефан Георгиев, комерцијален директор во „Лидл Северна Македонија“.

Во „Бестфуд ТИ“ велат дека барањата за влез во системот на Lidl донеле конкретни промени: „Соработката со ‘Лидл‘ беше силен мотив дополнително да го унапредиме нашето производство. За да ги исполниме строгите стандарди, инвестиравме во нова опрема, технологија и системи за контрола на квалитетот. Ова усогласување не само што ги подигна нашите критериуми, туку нè направи поконкурентен и стабилен партнер, подготвен за кој било европски пазар“, вели Крсте Ѓоргиев, управител на „Бестфуд ТИ“. „Млекарница Ѓоргиеви“ исто така вложува во нова опрема и автоматизација, а стандардите ги применува од откупот на сурово овчо и козјо млеко од локалните фарми до финалната контрола. „Стартот на производството за брендот Pilos е значаен чекор за нашата млекарница и за нашите кооперанти“, вели Адриана Панева, директорка на „Млекарница Ѓоргиеви“.

Lidl досега инвестирал повеќе од 200 милиони евра во развој на современа инфраструктура во Северна Македонија. Во 2025 година, извозот на македонски производи преку мрежата на Lidl достигнал 15,5 милиони евра. За домашните производители, велат компаниите и амбасадорката, овие бројки ја покажуваат поентата — патот до европските полици се отвора преку исполнување на европските стандарди, а не само преку интересот за македонските производи.

Двете компании најавуваат продолжување на инвестициите во модернизација и автоматизација за да одговорат на растечката побарувачка во земјава и во странство и го гледаат усогласувањето со европските норми како клучен чекор за долгорочен извозен раст.

Фото: Лидл)