Марко Б. осуден по напад и влегување во стан преку прозорец
Судот му изрече затворска казна и задолжително лекување по низа инциденти на иста адреса.

31-годишниот медицински техничар Марко Б. од Загреб доби казна затвор од една година по низа кривични дела на иста адреса, меѓу кои и физички напад врз маж и влегување во стан на жена преку прозорец, и покрај судска забрана за приближување.
Во пресудата на Општинскиот кривичен суд се наведува дека на обвинетиот му се изречени и задолжителни мерки за лекување од зависности и психијатриско лекување.
Претепал маж на 20 август 2025 и ја прекршил забраната во декември
Првиот инцидент се случил на 20 август 2025 година во стан на улицата Бериславиќева во Загреб. Марко Б. физички го нападнал Ф. Х., удирајќи го неколку пати во лицето. За време на пресметката двајцата паднале на подот, по што Марко го фатил мажот во таканаречен „крагна“ зафат и продолжил да го удира со тупаници во главата.
Нападнатиот се здобил со повеќе повреди, меѓу кои скршеница на носната коска, подлив околу окото, повеќекратни модринки и нагмечувања на главата.
Вториот случај се однесува на периодот од 7 до 18 декември 2025 година, кога обвинетиот не ги почитувал мерките за претпазливост. Иако постоела судска забрана да ѝ се приближува на А. Б. на помалку од 100 метри и забрана за било каков контакт, на 7 декември околу 22:30 тој се појавил пред нејзиниот стан и ѕвонел на вратата. Единаесет дена подоцна се вратил и овојпат влегол преку отворениот прозорец од спалната соба; жената побегнала откако го затекнала непоканет.
Иако на почетокот негирал вина, Марко Б. подоцна го променил исказот и признал двете кривични дела. Во своја одбрана изјавил дека жали за слученото, дека искрено се кае и дека нема намера да ги повтори делата. Додал и дека оштетениот Ф. Х. го познавал само еднаш или двапати.
Судот ги земал предвид признанието и изразеното каење како олеснителни околности, како и отсуството на полна пресметливост во времето на извршување на делата. Како отежнувачка околност била оценета претходната правосилна осуденост: во 2024 година тој веќе бил осуден, меѓу другото и за телесна повреда со елементи на насилство.
Покрај годишната затворска казна, судот му изрекол и мерки за задолжително лекување од зависности и психијатриско лекување.
Случајот ги отвори прашањата и кај нас: во Македонија се потпишуваше петиција за измени во законот за воведување електронски алки што би ја алармирале жртвата доколку сторител кој има изречена мерка забрана за доближување пристапи кон неа. Темата за семејно насилство и насилство врз жените повторно е актуелна поради големиот број пријави, некои со фатален исход, и критики дека мерките за претпазливост не секогаш ја штитат жртвата.
Фото: Унсплаш, Сасун Бугдаријан


