Масовен студентски митинг на „Славија“ во Белград пред изборите на 25 октомври

На плоштадот „Славија“ во Белград се одржа голем завршен предизборен митинг на Студентската листа – Студентите победуваат, пред вонредните парламентарни избори закажани за 25 октомври.

Марширaња и колонu од градот и од другите делови на земјата

Согласно најавите, граѓаните организирано се упатија кон плоштадот во шест колони од различни делови на градот, меѓу кои Нов Белград, Земун и Чукарица. Подоцна тргнаа и колони од Студентскиот плоштад, од зградата на Техничките факултети на булеварот „Крал Александар“ и од Автокоманда. Притоа беа организирани и повеќе автомобилски колони од разни делови на Србија.

На крајот на митингот кандидатите на листата слегoaа од бината и се наредија во круг околу фонтаната на „Славија“, држејќи го високо Уставот на Србија и играјќи оро. Собраните граѓани носеа српски знамиња и транспаренти со натписите „Студентска листа“ и „Студентите победуваат“ и свиреа со свирчиња, додека организаторите им се заблагодарија на присутните.

Кандидатот на листата, лекарот и универзитетскиот професор Југослав Гашиќ, од бината ја обвини актуелната власт дека ја поделила земјата и ги ставила личните и партиските интереси пред интересите на граѓаните.

„Оние што нè доведоа до работ на бездната ги посрамија вековите, понижија милиони, а украдоа милијарди. За некаква обединета Србија ни зборуваат оние што живеат од нашите поделби, а за Србија што победува – оние што со децении нè водеа од пораз во пораз“, порача од бината Југослав Гашиќ, кандидат на студентската листа, лекар и универзитетски професор.

Студентот на Биолошкиот факултет Арса Стојановиќ рече дека граѓаните во изминатите две години покажале волја, сила и искрен патриотизам и ги повика да излезат на гласање.

„Патриотизам на кој сите, без исклучок, треба да се гордеете и еден ден со крената глава да кажете: ‘Бев дел од победата!’“, рече Стојановиќ.

На митингот беа претставени и делови од програмата на Студентската листа: најави за реформи на судството и на обвинителството, образование достапно за сите, подобрување на здравствената заштита, вложувања во земјоделството и економијата, како и заштита на животната средина и работничките права.

Во меѓувреме, во Нови Сад вчера се спроведе голема полициска акција и беа уапсени лица осомничени за планирање масовни немири на денот на изборите.

Фото: Принтскрин