Медицински факултет во Скопје: постапката за вработување беше објективна, избраните кандидати беа подобро рангирани од д-р Дарко Василевски

Медицинскиот факултет во Скопје објави соопштение во кое наведува дека до денес факултетот не добил никакво известување од надлежни институции дека д-р Дарко Василевски официјално се обратил во врска со објавениот јавен оглас.

Во соопштението се посочува дека станува збор за јавниот оглас 01/2026 на Медицинскиот факултет при Универзитетот „Св. Кирил и Методиј“ – Скопје за засновање работен однос за 4 (четири) доктори по медицина, од кои 2 (два) извршители за Институтот за медицинска и експериментална физиологија со антропологија.

Како се спроведе постапката

Факултетот објаснува дека постапките за вработување се водат според Законот за високото образование, Законот за вработените во јавниот сектор и Законот за работните односи. Јавниот оглас го спроведе Комисија за селекција составена од тројца реномирани професори — раководители на институтите каде беа отворени работните места.

Комисијата ги прегледала доставените документи од вкупно седум кандидати кои конкурирале за огласените места, вклучително и пријавата на д-р Дарко Василевски, и утврдила дека пријавите се уредни. На сите пријавени им беа спроведени интервјуа.

По интервјуата, Комисијата за селекција предложила двајца кандидати кои исполнуваат општите и посебните услови за засновање работен однос. Факултетот нагласува дека постапката била објективна и транспарентна и дека во ниту еден момент д-р Дарко Василевски не бил доведен во понеповолна положба во однос на останатите кандидати. Исто така, избраните кандидати биле далеку подобро рангирани според формалното образование и резултатите од интервјуто.

Д-р Дарко Василевски е уредно известен за исходот од постапката и за тоа кои кандидати се избрани за засновање работен однос. Факултетот додава дека, доколку смета дека му е ускратено некое право од постапката, истиот може да ги оствари своите права пред надлежните институции. До денес факултетот не добил известување дека кандидатот официјално поднел жалба ниту дека е поднесена претставка до Комисијата за спречување и заштита од дискриминација; во случај таква претставка да пристигне во законскиот рок, факултетот ќе се произнесе по неа.

Соопштението е објавено во време кога медиумите известуваат дека еден специјализант започнал штрајк со глад откако бил одбиен на неколку огласи за вработување.

Фото: прес-материјал од настанот