Мицкоски: Без многудетни семејства економијата ќе зависи од странски работници

Премиерот Христијан Мицкоски предупреди дека Северна Македонија ќе има растечки дефицит на работна сила ако не се зголеми наталитетот и ако државата не ги зајакне семејните политики, порачувајќи дека економијата може да почне сè повеќе да се потпира на странски работници.

„Ако не се свртиме кон семејните вредности и кон многудетните семејства и ако тие вредности не ги промовираме, за жал македонската економија ќе биде прва која што ќе биде на удар“, рече Мицкоски, коментирајќи ја изјавата на потпретседателот на Владата и министер за транспорт, Александар Николоски, дека до 2030 година годишно може да ни бидат потребни 50.000 странски работници за да го задржиме сегашното ниво на БДП.

Реакции и бројки

Мицкоски посочи дека долго време говори за семејни политики: „Јас кога зборував пред една и пол-две години за семејни вредности, за фертилитет, тогаш ме направија дека сум заостанат, дека сум ретрограден, дека не знам што зборувам и што сè не прочитав за себе, но, за жал, тој предизвик останува и понатаму. И тоа што го укажуваше потпретседателот на Владата и министер за транспорт, можеби е и потценета вредност, можеби ќе ни требаат многу повеќе за да ја задржиме економската активност“, рече премиерот.

Од партијата Левица реагираа дека проблемот не е само демографски и посочија на нереализирани плаќања на додаток за трето дете и доцнења во породилните надоместоци. Тие исто така наведоа висок трошок на живот — синдикалната минимална кошница во октомври надминала 70.000 денари, околу 26.000 денари се потребни само за храна и пијалоци за четиричлено семејство — и голем раст на цените на недвижностите, до 3.000 евра за метар квадратен во Скопје, како и преку 300.000 празни станбени единици во државата.

За да ги ублажи недостигот, државата веќе дозволи ангажирање на странски работници, пред сè од Непал и Бангладеш; дел од нив работат во туризмот и услужните дејности, но некои ја користат земјата како транзитна точка кон западните пазари. Експертите предупредуваат дека намалувањето на работоспособното население ќе става дополнителен притисок врз здравствениот, социјалниот и пензискиот систем.

Статистичките податоци покажуваат дека бројот на вработени во индустријата во јануари–февруари 2026 година е намален за 3,5% во споредба со истиот период претходната година, а државата во последните пет години изгубила речиси 170.000 работници. Активното население се намалило за 165.976 лица во периодот 2018–2023 (од 957.623 на 791.647), а само во првите три месеци од 2025 година пазарот на труд се намали за уште 2.738 лица.

„Така што, колку и да сакаат да ме исмејуваат, јас ќе останам на оние семејни политики, на многудетни семејства и на политиките што значат иднина за Македонија како држава и нови работни места за македонскиот работник и поконкурентна македонска економија, која ќе расте“, додаде Мицкоски.

Фото: прес-материјал од настанот