Мицкоски: Пречекот на Груби во Чаир му ја отежнува ситуацијата

Премиерот Христијан Мицкоски изјави дека еуфоричниот пречек со факели и огномет за поранешниот прв вицепремиер Артан Груби во скопски Чаир, по укинувањето на мерката куќен притвор, не му оди во прилог туку дополнително ја отежнува неговата положба.

Адвокатскиот тим на Груби преку соопштение до медиумите упати извинување до граѓаните кои можеби биле вознемирени од настанот, посочувајќи дека собирот на 13 октомври бил спонтан, организиран од соседи, пријатели и симпатизери и бил без политички пораки и обележја. Од адвокатите велат дека Груби не учествувал во организацијата и дека нивниот фокус е на правната одбрана и на обезбедување законита и правична судска постапка.

Остануваат ограничувања и алтернативни мерки

На новинарско прашање за прославата, Мицкоски рече дека ја видел објавената извинителна порака и потенцираше дека поранешниот вицепремиер не е во иста положба како тој. „Не би рекол дека е слободен, како што јас сум слободен. Јас ја имам мојата патна исправа и можам да го напуштам градот и државата“, истакна премиерот.

Мицкоски објасни дека по истекувањето на законскиот рок од 60 дена судот има обврска да ја укине мерката куќен притвор и да определи друг начин за обезбедување присуство на обвинетиот, на пример со одземање на патната исправа.

Тој додаде дека поединци што организираат или учествуваат во такви егзалтирани улични прослави можеби сметаат дека им помагаат на своите сопартијци, но, според него, „Претпоставувам дека тоа е дел од карактерот на поединци кои мислат дека со вакот тип на естрада им помагаат на своите сопартијци, но мислам дека грешат, напротив им отежнуваат“.

На снимките објавени на социјалните мрежи се гледа како Груби — второобвинет во случајот „Државна лотарија“ — беше пречекан во Чаир со факели и чадни бомби, прошетуваше по чаирските улици во придружба на десетици граѓани, а потоа седееше во ресторан додека се слушаше пукање огномет.

Фото: прес-материјал од настанот