Мицкоски: Сè уште нема одговор од Софија за средбата

Премиерот Христијан Мицкоски изјави дека сè уште не е пристигнат одговор од Софија на барањето за средба што македонското Министерство за надворешни работи и надворешна трговија го испрати по совет од претседателката на Европската комисија, Урсула фон дер Лајен. Тој рече дека штом пристигне одговор, владата ќе може подетално да коментира.

За време на посетата на општина Теарце, каде присуствуваше на отворањето на нова детска градинка, Мицкоски ги демантираше тврдењата на опозицијата и на дел од медиумите дека тој изразил незадоволство од пораките на Фон дер Лајен или од застојот на евроинтеграцискиот пат.

“Видете, јас тоа го слушнав од опозицијата и од одредени медиуми блиски до неа. Мислам дека не само што не ја говорат вистината, туку и се обидуваат да ја искриват. Јас, напротив, кажав дека имавме исклучително квалитетен, содржаен и пријателски состанок и дека сето она што во иднина претставува лична посветеност и посветеност на Европската Унија нè мотивира да продолжиме по патот на реформите, и така и ќе продолжиме во периодот што следува”, истакна премиерот.

Средба и пораките

Мицкоски додаде дека претседателката на Европската комисија укажала на инспиративната работа на Владата во однос на реформите и евроинтегративниот процес. “Претседателката Фон дер Лајен, како никогаш досега, рече дека оваа влада прави инспиративна работа за реформите и за сето она што е посветено на приклучување на државата кон Европската Унија. Очекувам дека во периодот што следува, конечно, ќе можеме сите ние да го интензивираме овој процес и да најдеме решение од ситуацијата во која се наоѓаме”, нагласи Мицкоски.

Премиерот потсети дека на следниот ден по средбата со Фон дер Лајен рече дека не е задоволен од некои пораките, но дека средбата била исклучително пријателска, корисна и содржајна, која можеби ќе биде клучна за одредени процеси. Кога беше прашан што очекува од средбата со бугарската страна и што би се случило ако Софија ја одбие средбата, Мицкоски рече дека во таков случај „уште еднаш ќе се потврдат сите оние тези коишто ние ги имаме и за што сме загрижени“, но додаде дека не го очекува тоа.

Бугарската претседателка Илијана Јотова изјави дека Бугарија е секогаш отворена за разговори, но тие да бидат без ултиматуми и без отстапки од европската политика. “За овој разговор да биде сериозен, Мицкоски мора многу добро да ја прочита европската политика во врска со проширувањето на Република Северна Македонија и да заборави дека ова е билатерално прашање, како што тој се обидува да го претстави”, рече Јотова.

Фото: прес-материјал од настанот