Мисајловски: Интеграцијата на земјите од Западен Балкан во иницијативите на ЕУ ќе ја зајакне безбедноста на Европа
Во Брдо тој нагласи дека 2% од буџетот за одбрана, изградбата на коридори и европската помош за Криволак ги зајакнуваат регионалната и европската безбедност.
Министерот за одбрана Владо Мисајловски на денешниот состанок на министрите за одбрана во Брдо, Словенија истакна дека земјата ги јакне националната и регионалната безбедност преку инвестиции во Армијата и во воената мобилност.
Фокус на расходи, инфраструктура и европска поддршка
Како домаќин на состанокот на министрите од Централноевропската одбранбена соработка и од Западен Балкан, Мисајловски ја наведе посветеноста на буџетот и изградбата на коридорите како конкретни потези за зацврстување на безбедноста на сојузниците.
„Со инвестиција од 2 проценти во одбранбениот буџет и силните инвестиции во воената мобилност преку изградбата на коридорите 8 и 10, земјата не само што ги исполнува во целост своите обврски кон заедничката алијанса, туку и на терен ги зацврстува безбедноста и стабилноста на поширокиот регион“, рече Мисајловски.
Министерот го истакна и четвртиот европски пакет, кој првпат опфаќа активности за развој на инфраструктурата на полигонот „Криволак“, што според него е исклучително важен ресурс за обука на македонската Армија и на припадниците на вооружените сили на сојузничките и партнерските земји.
Мисајловски спомна и дека македонските војници даваат придонес во мисиите на НАТО – КФОР во Косово и на ЕУ – „Алтеа“ во Босна и Херцеговина, а констатираше дека со текот на годините регионот се трансформирал „од увозник во извозник на мир, стабилност и безбедност“.
„Интеграцијата на земјите од Западен Балкан во одбранбените иницијативи на Европската Унија дополнително ќе ги зајакне регионалната стабилност и севкупната безбедност на Европа“, додаде тој, повикувајќи на поголема вклученост на балканските партнери во релевантните инструменти на ЕУ.
Мисајловски учествуваше и на состанокот во рамките на Балканските медицински наменски сили (БМНС), каде го оцени успешното функционирање на иницијативата и повика на конкретни чекори за зголемување на нејзината видливост и одговорности: „Земјите членки на Балканските медицински наменски сили влегуваат во период во кој се потребни конкретни чекори за преземање поголема одговорност. Безбедносните случувања влијаат врз приоритетите на партнерите на БМНС, при што фокусот сè повеќе се насочува кон други региони. Токму затоа сега е потребно заеднички да покажеме и јасно да изразиме силна волја, посветеност и визија за понатамошниот развој на БМНС“, рече тој.
Во објава на својот официјален фејсбук-профил Мисајловски напиша: „Македонија како постојано седиште на Командата и водечка нација на БМНС во период 2026- 2028 година има јасна визија. Ние ја поддржуваме идејата за разгледување на можностите БМНС да даде свој придонес и надвор од балканскиот регион, за што ќе бидат потребни заедничка волја и посветеност од сите земји членки“.
Фото: Министерство за одбрана
