Вратени скоро 20 тони македонски јаболка од Бугарија поради пестициди

Пратка од скоро 20 тони македонски јаболка е вратена од бугарската граница откако лабораториските анализи на Бугарската агенција за безбедност на храната покажале остатоци од пестициди над дозволените законски граници.

Овоштарите велат дека се револтирани, особено што инцидентот се случува во најлошиот можен период: откупната цена на јаболката е катастрофално ниска, а производителите едвај ги покриваат трошоците за производство, струјата, ѓубривата и заштитните средства.

Производителите исто така тврдат дека користат пестициди како и сите други јаболкари во регионот и во Европа и се жалат на негативна пропаганда во последниот период. Тие апелираат за поголема селективност при известувањето и поригорозни контроли на домашниот пазар уште пред стоката да тргне кон извоз, со цел да се спречат штетни удари врз домашната економија и врз извозниците кои со години се борат за своите позиции во регионот.

Невклопливи трошоци и ниски цени

Јаболкарите посочуваат дека откупната цена е многу ниска: индустриското јаболко се откупува за 4 денари по килограм, додека конзумното јаболко се откупува за околу 15 денари по килограм. Дневниците за сезонските работници и берачите се искачија до 3.000 денари. За да покрие само една дневница за еден работник, овоштарот мора да продаде дури 750 килограми индустриско јаболко, што ја прави бербата математички неисплатлива.

Од друга страна, иако производството во Европа е намалено, европските ладилници во септември беа полни со залихи од минатата година над 50% повеќе од претходно, што дополнително ја гуши побарувачката на регионалните пазари.

Овоштарите велат дека вратената пратка од скоро 20 тони ја истакнува потребата од навремени домашни проверки и од мерки кои ќе ги заштитат малите извозници и приходите на земјоделците во време на веќе отежнат пласман.

Фото: прес-материјал од настанот