Москва привремено го забрани транзитот на живинско месо од ЕУ поради сомнителна пратка

Русија воведе привремена забрана за транзит на живинско месо и производи од живина од Европската Унија, откако властите пријавија сомнителна пратка со наводно фалсификувани ветеринарни документи.

Одлуката ја донесе Федералната служба за ветеринарен и фитосанитарен надзор на Русија (Росселхознадзор), која ја образложи мерката со ризикот од ширење на заразни болести кај животните и со потребата од заштита на потрошувачите.

Според рускиот извештај, спорната пратка содржела нуспроизводи од живинско месо со наводно германско потекло и била транспортирана преку Полска кон Узбекистан. Росселхознадзор наведува дека производите биле внесени преку границата на Евроазиската економска унија во возило со полски регистарски таблички, а за пратката биле приложени документи за кои руската страна тврди дека се фалсификувани.

Резултати од проверките

По извршените проверки, Росселхознадзор соопшти дека не било можно да се потврди вистинското потекло на производите.

"-Врз основа на анализата на информациските системи и одговорот на германската ветеринарна служба, утврдено е дека производот е од непознато потекло- наведоа руските власти."

Рускиот орган соопшти дека ограничувањето ќе остане на сила додека не заврши истрагата и не се одржат разговори со Европската комисија, што означува дека случајот ќе бара дополнителни проверки и контакт меѓу регулаторите на двете страни.

Фото: прес-материјал од настанот