Муцунски официјално побара средба со својата бугарска колешка, следната недела во Софија

Министерството за надворешни работи и надворешна трговија на Република Северна Македонија официјално испрати дипломатска нота со барање за средба меѓу министерот Тимчо Муцунски и бугарската министерка за надворешни работи Велислава Петрова-Чамова, потврдиле од министерството. Доколку Софија одговори позитивно, средбата би се одржала следната недела во Софија, на маргините на министерскиот состанок посветен на Коридорот 8.

Иницијативата за барањето доаѓа по денешната средба на премиерот Христијан Мицкоски со претседателката на Европската комисија Урсула фон дер Лајен во Скопје, на која биле разгледани предизвиците меѓу Скопје и Софија кои влијаат на евроинтегративниот процес на земјата.

Почетен дипломатски чекор за деблокада

Од Министерството за надворешни работи и надворешна трговија соопштија: "Од Министерството за надворешни работи и надворешна трговија денеска е побарана средба меѓу министерот за надворешни работи и надворешна трговија Тимчо Муцунски и бугарската министерка за надворешни работи Велислава Петрова-Чамова, којашто би се одржала следната недела на маргините на министерскиот состанок посветен на Коридорот 8".

На заедничката прес‑конференција по средбата, претседателката на Европската комисија рече: "Се договоривме да имаме прв чекор следната недела и да се обидеме да го деблокираме процесот, односно да го претвориме во процес, тоа е најважниот дел". Таа посочи дека следува обид да се придвижи натаму прашањето со Бугарија.

Премиерот Мицкоски изјави дека фон дер Лајен го советувала при посетата на министерот Муцунски на Софија да побара билатерална средба со неговата бугарска колешка, поради проектите поврзани со Коридорот 8. "Од претседателката (на ЕК) добив совет веќе следната недела кога нашиот министер за надворешни работи и надворешна трговија ќе биде во Софија, а причина за тоа е Коридорот 8 и проектите коишто ги движиме во рамките на тој Коридор, да побараме од домаќинот средба на билатерална основа. Јас веднаш побарав од министерот да испрати дипломатска нота и да побара време за средба и состанок со неговата колешка и да почнеме, процесот од некаде да го движиме", рече Мицкоски.

Фон дер Лајен дополнително нагласи дека усвојувањето на уставните измени останува следниот формален чекор што Северна Македонија треба да го преземе за да напредува на европскиот пат. Таа ги пофали реформските достигнувања на земјата според Планот за раст на ЕУ и изрази уверување дека, доколку процесот се деблокира, Европската унија ќе ја пречека Северна Македонија со нејзиниот идентитет и јазик.

Од опозицискиот СДСМ, пак, оценија дека постои ризик пристапувањето во ЕУ да се сведе од европеизација во билатерализација, реагирајќи на разговорите меѓу Скопје и Софија.

Фото: Принтскрин