МВР демантира дека кандидат бил прескокнат при приемот во Средното полициско училиште „7-ми Мај“

Министерството за внатрешни работи ги демантира тврдењата дека кандидат за прием во Средното полициско училиште „7-ми Мај“ не бил повикан на проверка на моторичките способности иако, како што се тврди, ги исполнувал условите од јавниот повик.

Од МВР велат дека селекциониот процес е сè уште во тек и се спроведува во повеќе последователни фази. На проверка на моторичките способности се повикуваат само кандидатите кои претходно успешно ја поминале административната селекција.

Што се проверува во административната селекција

Во рамки на административната селекција, меѓу другото, се утврдува исполнувањето на условот кандидатот да има најмалку „добар“ општ успех во двете завршени години средно образование и да не му биле изрекувани педагошки мерки во училиштето во кое ги завршил прва и втора година.

Во конкретниот случај, објаснуваат од МВР, кандидатот не е повикан на проверка на моторичките способности бидејќи не ја поминал административната селекција — односно не ги исполнил сите услови што се проверуваат во оваа фаза.

По завршувањето на целокупната постапка, кандидатите ќе бидат известени за исходот од селекцијата, а согласно предвидената постапка ќе им биде овозможен и увид во документацијата.

Министерството апелира да не се изнесуваат неточни и непотврдени информации пред официјалното завршување на процесот и нагласува дека селекцијата се спроведува професионално, согласно критериумите од јавниот повик и со еднаков третман на сите кандидати.

Фото: МВР