МВР: Групата „764“ манипулира и уценува деца
Министерството за внатрешни работи ги повикува родителите да ги препознаат ризиците и да пријават сомнителни активности кои вклучуваат закани и уцени.

20 ноември 2026 — Министерството за внатрешни работи (МВР) упати предупредување до родителите, старателите, наставниците и јавноста за појава на онлајн заедница позната како „764“ која таргетира деца и млади преку социјални мрежи, апликации и онлајн игри.
Од МВР наведуваат дека членовите на групата најчесто се претставуваат како врсници или како лица заинтересирани за пријателски или емотивен однос, по што започнуваат со манипулации, закани и уцени. Жртвите се принудуваат да испраќаат интимни фотографии и видеоснимки, да се самоповредуваат, да вршат насилство врз други лица или животни или да преземаат дејствија што можат да бидат животозагрозувачки, а собраните материјали потоа служат за дополнително заплашување и контрола.
МВР ги наведува следните платформи каде групата „764“ воспоставува контакт: Discord, Telegram, Roblox, Instagram, TikTok, Snapchat, Reddit, X, Minecraft и Fortnite. Според министерството, меѓународни безбедносни институции, вклучително и ФБИ, ја поврзуваат „764“ со пошироки нихилистички насилни екстремистички заедници.
На што да внимаваат родителите
Министерството апелира родителите и старателите да обрнат внимание на можни промени во однесувањето на децата. Меѓу знаците на кои укажуваат се:
- ненадејно повлекување во себе, страв, вознемиреност или раздразливост;
- зголемена таинственост при користење на мобилен телефон или компјутер;
- интензивна комуникација со непознати лица преку социјални мрежи и платформи за онлајн игри;
- примање заканувачки пораки, уцени или барања за испраќање фотографии и видеоснимки;
- необјаснети повреди, исеченици, гребнатини или други можни знаци на самоповредување;
- изразување безнадежност или разговори за смрт и самоубиство.
Од МВР предупредуваат дека овие промени не мора да значат дека детето е жртва на ваква група, но не треба да се игнорираат. Препорачуваат внимателен пристап, отворен разговор и навремена реакција доколку постои сомнеж за злоупотреба. Родителите треба редовно да разговараат со децата за нивните интернет-активности и да ги едуцираат за ризиците од споделување лични податоци и интимни материјали.
Доколку постојат информации или сомнежи за активности поврзани со „764“ или со други слични насилни онлајн групи, МВР повикува тие да се пријават до Секторот за компјутерски криминал и дигитална форензика. Министерството советува да се зачуваат пораки, кориснички имиња, линкови и други релевантни податоци и да се избегнува директна конфронтација со лицата кои упатуваат закани.
Анализите објавени неодамна од УНИЦЕФ укажуваат дека над 11.700 деца во Северна Македонија биле изложени на злоупотреби на интернет, а меѓу загрижувачките тенденции се заканите, уцените и злоупотребата на вештачка интелигенција. „Бидете внимателни, разговарајте со децата и пријавете ја секоја сомнителна активност“, апелираат од МВР.
Фото: прес-материјал од настанот


