Најмалку 7.000 овци уништени додека одгледувачите бараат вакцина

Најмалку 7.000 овци се уништени од службите досега додека болеста сипаници меѓу овците се шири низ повеќе региони, а одгледувачите тврдат дека државата се двоуми да набави вакцина која, според нив, би го запрела ширењето. Група сточари вчера протестираше пред Владата и побара итно донесување на вакцина која, како што им рекол Министерот за земјоделство, се договара преку Амбасадата на Турција.

Одгледувачите предупредуваат: крај за овчарството без вакцина

Првите случаи беа потврдени во февруари годинава, а според Сојузот на одгледувачи на овци „Модерен овчар“ досега надлежните служби уништиле помеѓу 7.000 и 10.000 грла. Организацијата посочува дека има повеќе од 50 жаришта и околу 40–50 целосно уништени стада, што оставило голем број семејства без извор на егзистенција.

Насер Џемаили, претседател на Сојузот, изјави: "Денес сме тука пред Владата за да апелираме што се случува со болеста сипаници кај овците. Гледаме дека никој не презема мерки, а дека секој ден се убиваат овци и секој ден се уништуваат големи стада. Бараме од Владата што побрзо да најде решение за болеста, да набават вакцина. Досега имаме повеќе од 50 жаришта и имаме околу 40-50 уништени стада и толку фамилии оставени без своето занимање, оставени на улица. Болеста е раширена насекаде, а има сопственици на стада што не ја пријавуваат болеста за да не им бидат уништени овците. Функционира и дивиот пазар. Некои на своја рака приватно ги вакцинираат. Состојбата е страшна. Кога има вакцина, зошто да ги загубиме стадата?"

Тој додаде дека има случаи каде службите доцниле со интервенцијата: "Има заболени стада, а 20 дена Агенцијата за храна и ветеринарство не оди да ги уништи. Замислете колку може да се прошири болеста. Досега имавме три-четири состаноци со Агенцијата за храна и ветеринарство, со Комората на ветеринарски станици, со Земјоделскиот факултет, но сепак нема заклучоци. Денеска сабајле ни се јави министерот и нè извести дека договарале вакцина преку Амбасадата на Турција и чекале што побрзо да се донесе." Џемаили предупреди дека последиците ги тераат луѓето да се откажат од сточарството: "И така никој не сака да чува овци, ако не се реши овој проблем, ќе биде крај за овчарството."

Во штипско, сточарот Илми Зекири тврди дека 70 до 80 отсто од овците се зафатени и опиша колку е тешко кога целото стадо се разболи: "Да станеш сабајле и да гледаш како цело стадо ти е болно, а ти живееш од нив и да не знаеш што да правиш, е нешто многу тажно. Ние живееме од тие овци. Решение не е да бидат убиени. Тоа е катастрофа. Обесштетување од 100 денари по килограм е срамота! Ни ги ценат овците по категорија. Нашите овци не се за ценење по категорија, ние ги чуваме за егзистенција. И ако веќе ни ги уништуваат, нека ни ги платат како што треба, а не од килограм. Од килограм се продава на трговци. Кај нас со сè се доцни – и со субвенции и со мерки. Ако по две години го исплатат обесштетувањето, тоа е бадијала."

Одгледувачите се жалат дека нуденото обесштетување и роковите за исплата се неадекватни. Милена Величковиќ од Куманово рече дека преговорите за набавка на вакцина траат повеќе од еден месец и дека до сега не слушнале убедливи аргументи против вакцинацијата: "Повеќе од месец се преговара за вакцинацијата. Аргументи против вакцинација досега не слушнавме. Единствен аргумент за неспроведување на вакцинацијата е што можеби ќе добиеме забрана за извоз од Европската Унија, но и тука нема официјален податок дали тоа би се случило. Реално, ниту месото од болна овцата е штетно по луѓето, ниту е штетно по вакцинацијата. Разговарав со професор и добив таков одговор дека не постои ни каренца-период за користење на месото или млекото по вакцинацијата." Таа посочи: "Дали тие на кои ќе им бидат уништени стадата, ќе се вратат во сточарството? Дали ќе има плус некоја мерка за нив затоа што обесштетувањето, да не речам, но е смешно. Дали ќе земат субвенции за оваа година? Тие овци не се загубени затоа што некој сакал, се случила болест."

Ветеринарите велат дека болеста не се пренесува на луѓето и дека месото и млекото од болни овци не се опасни за конзумирање, но нема лек и инфицираните животни може да умрат. Одгледувачите бараат брза набавка на вакцина, пофер и побрзо обесштетување и долгорочни државни мерки, бидејќи сегашниот сточен фонд — којшто се проценува на 250.000–300.000 овци — е далеку под некогашните бројки и може дополнително да опадне.

Фото: pexels-gurswin-prins