Të paktën tre të vrarë në Kropyvnytskyi pas më shumë se 10 orësh sulmesh ruse me dronë
Qendra logjistike dhe banesa në Kropyvnytskyi u goditën; Naftogaz njofton ndërprerje përkohëse të prodhimit në Poltava.
Të paktën tre persona u vranë dhe gjashtë u lënduan në sulmet e fundit ruse me dronë, që zgjatën më shumë se 10 orë në rajonin qendror ukrainas të Kirovohradit, njoftoi shërbimi ukrainas i mbrojtjes civile në Telegram.
U bë e ditur se u goditën qendra logjistike, depot dhe ndërtesa banimi në qendrën rajonale, Kropyvnytskyi. Gjithashtu u godit infrastruktura transportuese në zonë dhe shpërthyen zjarre.
Dëmtime edhe në objektet e energjetikës
Në rajonin fqinj Poltava, dronët goditën impiante prodhimi të gazit, njoftoi kompania shtetërore e energjisë Naftogaz, duke thënë se pajisjet u dëmtuan dhe prodhimi u ndal përkohësisht. Naftogaz pohoi se nuk pati punonjës të dëmtuar.
Forcat ajrore ukrainase thanë se gjatë natës së kaluar ushtria ruse përdori 580 mjete ajrore pa pilot të llojeve të ndryshme dhe dy raketa kundër objektivave në Ukrainë; 536 prej tyre u kapën në kohë, sipas deklaratës.
Megjithatë, u regjistruan goditje në 31 lokacione, ndërsa rrënojat e dronëve shkaktuan dëme edhe në 11 lokacione të tjera, njoftuan autoritetet.
Foto: material shtypi nga ngjarja
