Најмногу случаи на грип во Тетово, но активноста сè уште е под прагот

Бројот на пријавени случаи со грип и слични заболувања во земјата речиси се удвои за една недела — од 61 на 116 случаи — за периодот од 26 октомври до 1 ноември, што претставува раст од 90,2 проценти, соопштува Институтот за јавно здравје.

Најмногу пријави во Тетово и Куманово

Според податоците, во Тетово се регистрирани 48 пријави, во Куманово 26, а во Скопје 13. Прилеп и Гостивар пријавиле по седум случаи. Особено е нагласен порастот во Тетово, каде претходната недела беа пријавени само четири случаи.

Тетово и Куманово заедно учествуваат со речиси 64 проценти од вкупниот број пријавени заболувања во државата. Најголем дел од заболени се возрасни помеѓу 15 и 64 години — вкупно 84 лица; кај лица над 65 години се пријавени 25 случаи, додека кај деца на возраст од пет до 14 години се пријавени седум случаи.

Лабораториските испитувања покажуваат дека вирусот на грип веќе циркулира: од 47 испитани примероци во Институтот за јавно здравје, четири биле позитивни на инфлуенца А — три несубтипизирани и еден од типот A(H1)pdm09. Дополнително, еден примерок бил позитивен и на коронавирусот SARS‑CoV‑2. Сите 116 пријавени случаи, сепак, не претставуваат лабораториски потврден грип, бидејќи неделниот надзор ги вклучува и болестите со симптоми слични на грип.

Пријавената инциденца изнесува 6,3 случаи на 100.000 жители, што е под границата за влез во сезонска активност од 7,32 случаи на 100.000 жители. Според Институтот за јавно здравје, тоа значи дека сезонскиот бран сè уште не е официјално започнат.

Фото: прес-материјал од настанот