Нашиот извоз: 11 милиони кг домати и 2,5 милиони кг краставици во јуни–јули

Податоците од Царинската управа за јуни и јули покажуваат дека македонскиот извоз на свеж зеленчук во тој двомесечен период е далеку поголем од увозот: извезени се 11 милиони килограми домати и 2,5 милиони килограми краставици и корнишони, додека увозот изнесува 700.000 килограми домати и 280.000 килограми краставици.

Извозот на краставици и корнишони донесе девизен прилив од 2,2 милиони евра, а на доматите речиси 7 милиони евра. За увезените количини платено е 274.000 евра за краставици и околу 370.000 евра за домати. Просечните цени пресметани од овие текови покажуваат дека за извезените краставици просечната цена е 55,5 денари по килограм, а за увезените 60 денари; за доматите просечната цена при извоз е 39 денари, а при увоз 33 денари.

Каде оди производот и по кои класи

Блажо Витанов од компанијата за дистрибуција, откуп, увоз и извоз Imperator Fruit вели дека доматите обично одат на традиционалните пазари во регионот. „Кога се правеше извозот, доматот одеше на нашите традиционални пазари, а тоа се Србија, Црна Гора и Бугарија. Таму обично оди 70 до 80 проценти од извозот на домати. Корнишоните главно одат во домашната конзервна индустрија. Сега прва класа се откупува по 65 денари за килограм, втора за 30 и трета за 20 денари за килограм. Нешто краставици сега се извезуваат за Австрија и за Германија,“ објаснува Витанов.

Во моментов Imperator Fruit откупува и црвена пиперка — прва класа 40 денари, втора 35, а трета или индустриска 25 денари за килограм. Витанов вели дека црвената пиперка се извезува за Бугарија, Хрватска, Чешка, Германија и Полска.

За ниските цени на пиперката Витанов констатира: „Иако сум откупувач, кажувам дека пиперката се продава по многу ниска цена. Да работиш сега во пластеник на оваа температура и да добиеш 25 денари е катастрофа. Ова не се пиперки што се произведуваат на отворено, туку се од пластеници. Но, цената ја одредува понудата и побарувачката.“

Витанов додава дека сезонава црвената пиперка доаѓа порано: „Четириесет дена веќе се извезува црвена пиперка. Откупот почна со 100 денари. За индустриски потреби извозот и откупот почнува на 5/10 август.“ Тој посочува дека конзервната индустрија често има договори за откуп и дека некои компании ангажираат поевтина суровина од странство: „Македонија е членка на ЦЕФТА. На слободен пазар некои компании наоѓаат поевтин зеленчук. Правилата се такви,“ вели Витанов.

Земјоделците од Струмичко веќе со денови протестираат поради откупната цена на сортата куртовска капија. Дали и колку ќе биде пласирана годинашната род во странската конзервна индустрија ќе се знае по завршувањето на сезоната за правење ајвар и други конзервирани производи.

Фото: прес-материјал од настанот