Не штедете на здравјето на жените — ЛДП бара итни системски промени

На 30 октомври 2026 година Либерално-демократската партија (ЛДП) спроведе симболична герила акција во Скопје со цел да алармира за потребата од системски промени кои ќе го зголемат опфатот на скрининг-програмите за жените.

„Додека надлежните штедат на здравјето, жените во Македонија се соочуваат со сурова реалност и погубна статистика – според Државниот завод за ревизија, со скрининг-мамографија се опфатени одвај 0,8 до 5,4 проценти од жените, а со скрининг за рак на грлото на матката само 10,3 до 15,5 проценти. Ова не е обична статистика, зад овие бројки стојат човечки животи изгубени во систем без грижа,“ изјави претседателката на ЛДП и пратеничка во Собранието на Македонија, Моника Зајкова.

Кои мерки ги предлага ЛДП

Во својата платформа партијата побара итни и конкретни решенија: гарантирани термини за превентивни прегледи, автоматски покани за скрининг, и еден платен слободен ден годишно за превенција и преглед.

ЛДП предлага и дека државата треба да го покрие трошокот за прегледи во приватното здравство кога јавниот систем не може навреме да обезбеди термин, нагласувајќи дека болеста не чека и административните бариери не смее да одлучуваат за живот.

Партијата дополнително бара Министерството за здравство месечно јавно да објавува колку термини се достапни за мамографија, ехо на дојка и ПАП‑тестови, колку граѓани чекаат и колку долго, како и да воведе итна дијагностичка постапка при сомневање за канцер, наместо месеци чекање по коридорите.

Според партиските претставници, акцијата има за цел да го фокусира вниманието на јавноста кон, како што рекоа, лишувањето од навремена превенција и да го притиснат раководството да преведе скринингот од изборна кампања во загарантирано право.

Фото: прес-материјал од настанот