"Askush nuk ju frikësohet, njerëzit po qeshin me ju" — Filipçe për kërcënimet me burg dhe tenderin prej 20 milionë eurosh
Raporti i Parlamentit Evropian është një nga më të këqijtë deri më tani, ndërsa qeveria propozon ligj për të shpenzuar 20 milionë euro jashtë të gjitha ligjeve sistemore, akuzoi lideri i LSDM-së
Lideri i LSDM-së, Venko Filipçe, në Kuvend iu përgjigj ashpër retorikës së kryeministrit Hristijan Mickoski, duke vlerësuar se kërcënimet me burg janë bërë përgjigjja e vetme e pushtetit ndaj kritikave. "Kërcënoni këtu nga foltorja me burgje, me hekura. Më besoni, askush nuk ju frikësohet. Askush fare nuk ju frikësohet. Jeni qesharakë — njerëzit po qeshin me ju. Nuk i përshtatet funksionit që e ushtroni", tha Filipçe.
Ai kujtoi se raporti i fundit i Parlamentit Evropian për vendin është "një nga më të këqijtë deri më tani", me gjetje për trajtim të dobët të korrupsionit dhe ndikim të drejtpërdrejtë të pushtetit mbi gjyqësorin e pavarur. "Dhe ju nuk keni asnjë reagim për këtë. Përkundrazi, vazhdoni me partizimin e gjykatave", tha ai, duke shtuar se në këtë perceptim negativ te funksionarët e lartë evropianë ndikon pikërisht qëndrimi i kryeministrit.
Akuzën më të rëndë Filipçe e lidhi me projektligjin e ri të qeverisë: "Dje propozoni ligj me të cilin doni të shpenzoni 20 milionë euro, duke i anashkaluar të gjitha ligjet sistemore të shtetit për prokurime publike. Po mirë, cili është qëllimi? Çfarë doni të arrini? Çfarë praktike evropiane është ajo? Asnjë. Është e juaja — e këtij pushteti që merret vetëm me tenderë korruptivë që nga fillimi i qeverisjes."
Ai zbuloi gjithashtu se çështja e kredisë hungareze po hapet jashtë vendit: "Doli në publik — jo nga ne, por sërish nga Evropa, nga Hungaria — se do të hetohet kredia hungareze."
Në kontekst të gjendjes ekonomike, Filipçe theksoi se taksat dhe shpenzimet po rriten, ndërsa "pagat stagnojnë — njerëzit janë në prag të ekzistencës".
Foto: LSDM / regjistrim video nga Kuvendi
