Nikoloski: Ndryshimi i qeverisë në Serbi nuk do të ndalojë projektet infrastrukturore të përbashkëta

Zëvendëskryeministri dhe ministër i Transportit Aleksandar Nikoloski tha se nuk pret që ndryshimi i qeverisë në Serbi, pas fitores së Listës së Studentëve në zgjedhjet e parakohshme parlamentare, të ndikojë negativisht në ndërtimin dhe finalizimin e projekteve infrastrukturore të përbashkëta midis Shkupit dhe Beogradit, veçanërisht në pjesën e hekurudhave.

Projekte që e tejkalojnë mandatin

Gjatë konferencës së përbashkët për shtyp me Zëvendëskryeministrin për Çështje të Jashtme dhe Evropiane të Qeverisë së Malit të Zi, Filip Ivanoviç, i cili ndodhet në vizitë në vend, Nikoloski tërhoqi vëmendjen tek Korridori 10 si një lidhje natyrale drejt Detit Egje dhe e përmendi pikën e përbashkët hekurudhore në Tabanovc si dhe planin për një hekurudhë me shpejtësi të lartë përgjatë korridorit.

"Atje kemi një komponent të madh të granteve që e përdorim përmes mekanizmit të mbështetjes së Bashkimit Evropian për Ballkanin Perëndimor; pra është një grant direkt nga Bashkimi Evropian. Është zgjedhur një ndërtues, ajo është kompania maqedonase 'Granit', kështu që dinamika e punimeve është në përputhje me atë që është nënshkruar në kontratë dhe pres që, nëse gjithçka shkon mirë, në përputhje me afatin, deri në fund të vitit të ardhshëm ai kalim hekurudhor i përbashkët të përfundojë dhe pastaj të vihet në funksion", tha Nikoloski.

Ai shtoi se brenda dy vjetësh pritet të funksionojë sistemi i ndalimit të vetëm edhe në trafikun hekurudhor në kufirin me Serbinë dhe se nuk sheh arsye pse Maqedonia dhe Serbia të mos kenë një kalim të përbashkët hekurudhor që do të mundësonte transit më të shpejtë, veçanërisht për trenat e mallrave.

Në lidhje me hekurudhën me shpejtësi të lartë, Nikoloski e përshkroi edhe atë si projekt strategjik dhe si dëshmi që ndryshimet e qeverive nuk ndikojnë domosdoshmërisht në projektet e mëdha e përmendi nisjen e trenit të shpejtë në linjën Beograd–Budapestë–Vjenë, e planifikuar të nisë më 13 dhjetor.

Filip Ivanoviç tha se ende është herët për të gjykuar lëvizjet e para të autoriteteve të reja në Republikën e Serbisë dhe se fituesit e zgjedhjeve duhet t'u lëshohet koha për të formuar institucionet dhe pushtetin ekzekutiv dhe për të sjellë një lloj plani për politikën që duan të zbatojnë.

"Mali i Zi me Serbinë ndan shumë gjëra që nuk lidhen vetëm me infrastrukturën, ekonominë dhe tregtinë. Ajo që ne dëshirojmë është të vendosim marrëdhënie sa më të mira midis dy shteteve tona... Sa do të ecë ndërtimi i atij autostrade dhe projekteve të tjera, kjo natyrisht është çështje për pushtetin e ri në Serbi. Sa i përket nesh, ne padyshim do ta bëjmë atë", shtoi Ivanoviç.

Foto: Printskrin