Николоски за проблемот на превозниците: Можеме да одржуваме одлични конференции, но ако останеме затворени, беспредметен е секој разговор

Вицепремиерот и министер за транспорт Александар Николоски предупреди на „Форумот за глобална трговија и раст 2026” во Скопје дека организацијата на конференции и дебати е бесцелна ако македонските превозници и натаму се соочуваат со практични пречки при влез и престој во шенген-зоната.

„Ние можеме да организираме и одржуваме одлични конференции, да си муабетиме, но ако потоа останеме затворени, беспредметен е секој разговор“, рече Николоски, опишувајќи ја состојбата на домашните професионални возачи.

На панел-дискусијата, во организација на Швајцарската комора на Македонија, тој истакна дека македонските професионални возачи сè уште се третираат како туристи и поради тоа подлежат на правилото за ограничен престој од најмногу 90 дена во период од 180 дена.

Постигнати конкретни чекори, но недостига организиран пристап од ЕУ

„Се обидувавме да најдеме заедничко решение како земја од Западен Балкан заедно со шенген-зоната, но, за жал, нема финално решение од страна на ЕУ. Би рекол дека изостанува организиран пристап“, нагласи тој, повикувајќи на координиран одговор.

Николоски посочи дека досега се направени две конкретни работи: возачите да бидат признаени како професионалци во новата визна стратегија на шенген-зоната, а исто така се склучени директни билатерални договори со неколку земји од шенген-зоната за издавање долгорочни визи за превозниците. Тој упати благодарност до Швајцарија за тоа што ја започна примената на овој модел.

„Швајцарија тука беше прва, за што се заблагодарувам. Почна да издава вакви работни визи за возачите и се надевам дека тоа ќе биде пример што ќе го следат и другите земји членки на шенген-зоната“, додаде Николоски.

Министерот информира дека со Хрватска веќе е склучен билатерален договор, а Швајцарија го потврди својот модел. Со Романија, како што рече, постигнато е решение по кое на македонските возачи ќе им се издаваат дозволи наместо визи, а во тек се разговори со Бугарија и со Грција за возачите кои влегуваат и излегуваат во истиот ден да не подлегнуваат на регистрација.

Во контекст на конкурентноста, тој посочи дека е значително поскапо кога туѓ превозник доаѓа да ја земе пратката, отколку да ја однесе домашен превозник. „Колку е поскапо странски превозник да дојде, да ја земе, па да ја однесе таму каде што треба. Ова е навистина голем, голем предизвик за ние да зборуваме за проширување на граничните премини“, додаде тој.

Професионалните возачи и транспортери, организирани од транспортната асоцијација „Макам-транс“, на 31 август протестираа пред седиштето на Делегацијата на Европската Унија во Скопје, каде беа паркирани околу дваесетина камиони. На протестот превозниците порачаа: „На пат сме за работа, не за одмор“.

Фото: прес-материјал од настанот