Нов скандал: 51 бактерија во водата во болницата во Лешок уште од мај — „никој не реагирал“, обвинува Филипче

Скандалот со загадената вода не завршува во Гостивар. Лидерот на СДСМ Венко Филипче на прес-конференција обелодени документи, доставени од укажувачи, кои според него покажуваат дека и во Болницата за белодробни заболувања во Лешок водата со месеци не одговарала на стандардите за пиење — а никој не презел ништо.

Филипче покажа извештај од испитување на водата датиран на 13 мај, во кој е констатирано присуство на колиформни бактерии.

„Вкупен број на колиформни бактерии во 100 милилитри вода — 51. Во болницата во Лешок. На крајот на мај. Никој не реагирал“, изјави тој, нагласувајќи дека станува збор за здравствена установа во која лежат пациенти со белодробни заболувања, односно најранлива категорија граѓани.

Хлор двојно над дозволеното

Лидерот на опозицијата предупреди и на нов наод од гостиварската болница, според кој нивото на хлор во водата било речиси двојно повисоко од дозволеното. Долготрајната изложеност на високи концентрации хлор, објасни тој, во контакт со органски материи создава опасни соединенија.

Според Филипче, станува збор за трихалометани — соединенија кои во медицинската литература се поврзуваат со канцерогени ефекти при долготрајна изложеност. Тоа, како што рече, го прави прашањето на квалитетот на водата не само локален инцидент, туку национален јавноздравствен проблем.

Барање за итни инспекции низ целата држава

Како одговор на новооткриените документи, Филипче побара итни вонредни инспекции и хемиски и микробиолошки анализи на сите водоснабдителни станици во државата, со резултати кои веднаш ќе бидат објавени пред јавноста.

Тој повтори дека покрај стручните мерки, мора да следуваат и оставки и кривична одговорност за сите функционери кои знаеле за наодите, а не презеле ништо — од министерот за здравство до директорите на јавноздравствените институции и Агенцијата за храна и ветеринарство.