Qytetarët do të kenë letërnjoftimet dhe patentat në telefon nga e enjtja

Qytetarët nga e enjtja do të mund të kenë në telefonat e tyre të mençur letërnjoftimin dhe lejen e drejtimit të automjetit, njoftoi ministri për Transformim Digjital, Stefan Andonovski, para prezantimit të aplikacionit.

Aplikacioni funksionon si portofol digjital me QR-kode njëpërdorimshme

Aplikacioni do të promovohet të mërkurën, ndërsa nga e enjtja do të nisë zbatimi zyrtar i portofolit elektronik, tha Andonovski. Ai theksoi se me anë të tij përdoruesit nuk do të jenë të detyruar të zbulojnë të gjithë të dhënat personale ashtu si me kartat fizike.

Ministri shpjegoi se përdorimi i të dhënave bëhet në mënyrë selektive dhe e sigurt: qytetarët vetë do të zgjedhin cilat të dhëna dëshirojnë t'i ndajnë, dhe ato do të shkëmbehen përmes një QR-kodi të krijuar për përdorim të vetëm. Si tha ai: "Për shembull, kur dëshironi të identifikoheni në një bankë, bar ose ndonjë lokal tjetër, nuk do të duhet të tregoni të gjitha të dhënat nga karta e identitetit. Ju do të mund të zgjidhni vetë cilat të dhëna dëshironi t'i ndani, në mënyrë të sigurt. Të dhënat do të ndahen përmes një QR-kodi, i cili gjenerohet për përdorim të vetëm. Kodi skanohet, dhe personi tjetër i merr të dhënat vetëm nëse ju e lejoni. Pas 10 deri 15 sekondash, QR-kodi skadon dhe nuk mund të përdoret më."

Andonovski potencoi se është kushtuar vëmendje e madhe sigurisë së aplikacionit dhe se kjo nismë është hapi i parë drejt portofolit digjital evropian dhe digjitalizimit të plotë të dokumenteve.

Ai u shpreh i bindur se me zhvillimin e mëtejshëm të portofolit mobil do të shtohen shërbime, mundësi dhe dokumente të reja për qytetarët.

Foto: material shtypi nga ngjarja