Одложена БСЖ вакцинација — здравствените власти: Нема простор за паника

Здравствените власти ги повикаа граѓаните да не паничат поради привременото одложување на вакцинирањето со БСЖ кај новороденчињата додека трае проверка на неколку сомнителни несакани ефекти пријавени во регионот.

Како што истакнаа, Македонија и натаму е земја со ниска стапка на туберкулоза — околу 10 случаи на 100.000 жители годишно. Остеомиелитисот, воспаление на коската, е ретка несакана реакција поврзана со БСЖ; според надлежните, се регистрираат околу два случаи на милион вакцинирани деца.

Директорката на Клиниката за респираторни заболувања кај децата „Козле“, Катерина Бошковска, потсети на тековните бројки и на тоа дека клиниката лечи деца со туберкулозна болест: „Децата коишто се дијагностицираат, лекуваат во нашата установа, минатата година се 15 случаи, сега до овој месец имаме 12 регистрирани случаи — зборувам за туберколозна болест. Секако кај нас доаѓаат контактите со туберкулоза, каде што има возрасен болен во фамилијата најчесто; такви сме имале минатата година 35, сега се до 10 во овој момент“, изјави Бошковска.

Кога родителите треба да бараат лекарска помош

Бошковска им порача на родителите да обратат внимание на локални симптоми кои бараат брза лекарска проценка: „Доколку постои некакво сомневање, било какво, дека детето има оток на ногата, на раката, на стопалото, тој оток е болен, има ограничување на движењата на екстремитетот или ако приметиме дека ја штеди ногата, криви кога оди, секако ќе побараат лекарска помош и испитувања. Ние сме тука, се што треба ќе се направи. Меѓутоа, нема простор за загриженост, не значи дека секое дете кое примило вакцина треба било какви испитувања, снимки да прави заради овие случаи, бидејќи тие случаи како што слушаме во изминатите денови не се докажани туку се сомнителни“, додаде таа.

Сомнителните случаи за можно воспаление на коските прво беа пријавени во Хрватска — четири пријави. Од бугарскиот производител Bul Bio соопштија дека кај две деца можеби била применета доза 10 пати поголема од пропишаната, но производителот ги отфрла тврдењата за проблеми со квалитетот на вакцината. Надлежните здравствени служби во земјава ќе го проверат случајот.

Меѓутоа, додека се чека пристигнувањето на новата консигнација, Министерството за здравство набави едногодишна количина БСЖ вакцини од Јапонија. До доставувањето на новата пратка, новороденчињата во родилиштата нема да примаат БСЖ вакцина; вакцинацијата ќе продолжи веднаш штом ќе пристигнат новите вакцини.

Фото: прес-материјал од настанот