Pushimet e kanë bllokuar dialogun për zgjidhjen e mosmarrëveshjes me Bullgarinë

Pushimet kolektive verore në Bruksel dhe te shtetet anëtare të BE-së e kanë pezulluar për disa javë dialogun për zhbllokimin e procesit të integrimit evropian të Maqedonisë së Veriut.

Ministri i Jashtëm Timcho Mucunski tha se pret që bisedimet të rinisin brenda javëve të ardhshme, por nuk mundi të konfirmojë nëse nga Brukseli ose Sofja ka një qëndrim nëse ndryshimet kushtetuese me hyrje në fuqi të mëvonshme do të pranoheshin si zgjidhje. Qeveria sërish e hapte temën se në Kornizën e Negociatave me BE-në nuk ka dispozitë lidhur me kohën e hyrjes në fuqi të ndryshimeve kushtetuese.

Garanci dhe reciprocitet

"Dua të theksoj se pozicionet e shtetit tonë janë absolutisht të qarta, se ne presim një sistem garancish nga institucionet evropiane, presim respektimin e reciprokitetit kur bëhet fjalë për të drejtat e njeriut dhe presim që të ketë një zgjidhje që do të ketë për qëllim mbrojtjen e pozicioneve tona lidhur me gjuhën, kulturën dhe historinë tonë," tha Timcho Mucunski, Ministër i Punëve të Jashtme dhe Tregtisë së Jashtme.

Ai përsëriti vijat e kuqe të qeverisë, por shtoi se është në interes të vendit të arrihet një marrëveshje e qëndrueshme. "Ne kemi dialog me të gjitha palët e përfshira në këtë proces. Ne, në thelb, që e udhëheqim atë dialog, me shtetet anëtare të BE-së, me institucionet e BE-së, të cilat janë të orientuara drejt gjetjes së një zgjidhjeje, brenda kornizave të atyre pozicioneve që qeveria i ka prezantuar para publikut. Duke mbrojtur interesat kombëtare, por gjithmonë duke kuptuar se është e nevojshme, në interesin tonë, të gjendet një zgjidhje e qëndrueshme dhe e drejtë," tha Mucunski.

Ministri njoftoi gjithashtu se diplomati karrierës Krum Efremov, i cili aktualisht shërben si drejtor i Drejtorisë për Diplomaci Ekonomike, ka përfunduar procedurën e dërgimit në mision dhe së shpejti pritet të marrë postin si ambasador i Maqedonisë së Veriut në Bullgari, me seli në Sofje.

U theksua se nga gjithsej 59 përfaqësi konsullore-diplomatike, aktualisht 11 ambasada dhe konsullata janë pa kreu misioni, ndërsa mandatet e 6–7 ambasadorëve të tjerë do të skadojnë gjatë gjashtë muajve të ardhshëm.

Foto: material shtypi nga ngjarja