Охрид добива пристапна инфраструктура на пет плажи со 187.000 евра

Општина Охрид ќе ги унапреди пристапните услови на пет јавни плажи на охридското крајбрежје со 187.000 евра од проектот „Достапна авантура преку границите“ — средствата ќе се користат и за набавка на специјализирано возило и изградба на инклузивно моторичко игралиште.

Патеки, соблекувални и простори за спасување во планот

Конкретните интервенции на плажите предвидуваат поставување современа урбана опрема, пристапни патеки, соблекувални и санитарни јазли, како и други технички решенија што ќе овозможат полесен и побезбеден пристап до езерото за лицата со попреченост и намалена подвижност. Во проектот е предвидена и посебна просторија опремена за спасување и набљудувачница за спасителната служба.

Покрај инжењерските работи, проектот опфаќа и таканаречени меки мерки — изработка на студии, обуки, менторство, практично учење и размена на искуства за туристичките работници и други релевантни страни, со цел зголемување на свеста за потребите на лицата со попреченост и развој на достапни туристички услуги.

Општината ќе набави и специјализирано возило за лица со попреченост, кое ќе го стави на располагање и ќе ги обезбедува неговото одржување. Во комплексот на касарната, каде веќе постојат детски игралишта, ќе се изградe и нов моторички парк — инклузивно игралиште за деца со попреченост што ќе биде комплементарно со објектот што го користи Здружението на лица со церебрална парализа и со попреченост.

„Со реализацијата на проектот се очекува значително подобрување на пристапноста на охридските плажи, зголемување на бројот на туристи со попреченост, подобри услови за безбедност и рекреација, развој на инклузивен и одржлив туризам, како и зајакнување на туристичката понуда“, изјави Ѓоко Апостолов, раководител на Секторот за туризам и локален економски развој на Општина Охрид.

Проектот е дел од програмата Интерег ИПА за прекугранична соработка меѓу Северна Македонија и Грција за периодот 2021–2027 година и има за цел создавање прекугранична рута за пристапен авантуристички туризам што ќе ги поврзе планинските и езерските дестинации во двете земји. Во реализацијата учествуваат YMCA од Солун, Грчката национална туристичка организација, Општина Охрид, Мрежата за рурален развој на Северна Македонија и Скаутската асоцијација „Крсте Јон“ — Струга.

Во Охрид неодамна се одржа првиот координативен состанок за почеток на активностите и договор за понатамошна соработка меѓу партнерите.

Фото: СДК.МК)