ОЈО: Нови седум осомничени за транспорт на марихуана од Македонија во Србија

Основното јавно обвинителство соопшти на 17 август 2026 дека издаде нова наредба за спроведување истражна постапка против уште седум лица поврзани со организиран транспорт на марихуана од Македонија во Србија.

Од ОЈО наведуваат дека истрагата, која од февруари 2026 се води во единицата за организиран криминал (ОЈО ГОКК), и докази обезбедени преку истражни дејствија и меѓународна соработка со надлежните органи на РСрбија, укажале на поширок круг осомничени. Новите седуммина се сомничат за делото Неовластено производство и пуштање во промет наркотични дроги, психотропни супстанци и прекурсори од член 215 став 3 во врска со став 1 од Кривичниот законик.

Во соопштението од ОЈО е наведено:

„Имено, од засега неутврден период во текот на 2025 година до крајот на јануари 2026 година, на македонската и српска територија, шестмината против кои се води постапка во РСрбија, шестмината опфатени со истрагата на ОЈО ГОКК од февруари, седуммината новоосомничени, како и други засега непознати лица, се здружиле заради неовластена продажба и пуштање во промет наркотична дрога марихуана. Секој од нив имал определена улога, при што самите или преку други непознати лица преземале, држеле и пренесувале наркотична дрога марихуана заради нејзина понатамошна неовластена продажба и пуштање во промет на територијата на Република Србија и други држави. Како параван за недозволените активности било користено правното лице во Скопје кое поседува одобрение за одгледување канабис за медицински цели и дозвола за производство на екстракти од канабис за медицински потреби. Сопствениците на правно лице од Скопје, од кои едниот е и управител, заеднички и по претходен договор организирале и други засега непознати лица од РСрбија и РСМакедонија за заеднички да набавуваат наркотична дрога марихуана и во повеќе наврати да ја транспортираат од РСМакедонија во РСрбија. За таа цел користеле товарни возила и царински декларации со кои се прикажувало дека се превезува текстилна, прехранбена и друг вид стока. Откако наркотичната дрога ќе била пренесена преку државната граница, организирале нејзино складирање во месноста Коњух кај Крушевац, каде марихуаната се препакувала и дистрибуирала за натамошна продажба.“

Од досега обезбедените докази, додаваат обвинителите, истиот modus operandi бил применет при најмалку пет транспорти. Кај товарните возила со претходно царинета и пломбирана стока се отстранувала пломбата, дел од царинетата стока се вадел и на нејзино место се ставале кутии со марихуана со тежина приближно еднаква на извадената стока. Потоа возилото се упатувало кон ГП Табановце, каде обично било следено од некој од осомничените со патничко моторно возило. Марихуаната била прикриена како прехранбени производи, перници и јоргани.

Српското Јавно обвинителство за организиран криминал на 21 јули 2026 поднесе обвинение против шест членови на организирана криминална група за меѓународен недозволен транспорт на марихуана. Според обвинението, двајца од сопствениците на скопското правно лице давале насоки и ги координирале припадниците на групата кои ја примале и складирале дрогата во магацински простор во месноста Коњух; дел од дрогата бил складиран и во помошни објекти во домот на сопственикот во Коњух и таму се препакувала за продажба во Белград.

Во меѓувреме, во постапката што ја води ОЈО ГОКК, Основниот кривичен суд Скопје на 10 август 2026 донесе две пресуди засновани на предлог-спогодби со двајца осомничени. Со спогодбите, осомничените ги признале делата и им се изречени казни затвор од три години и шест месеци, односно три години и осум месеци. Истрагата продолжува, а обвинителството најави дека ќе ја продолжи меѓународната соработка за целосно разоткривање на мрежата.

Фото: прес-материјал од настанот