Опозициско обединување и повик за промени во СДСМ, Филипче тврди дека иницијаторите се платени

Група актуелни и поранешни функционери на СДСМ го претставија својот план — платформа чија цел е обединување на опозицискиот фронт, промени во раководството на партијата и, како краен резултат, пораз на власта.

На денешниот брифинг поранешниот претседател на СДСМ, Игор Ивановски, рече: „Нема да бидеме нова политичка партија, нема да креираме ни независни листи за парламентарни избори“. Тој оцени дека во општеството постои големо опозициско расположение кое не се артикулира поради отсуство на енергична, јасна и фокусирана опозиција.

Пратеничката Славјанка Петровска предупреди дека неусогласеноста во СДСМ оди во прилог на власта. Таа не сакаше да открие колку лојални се нејзините колеги во пратеничката група, но рече дека сите ја делат загриженоста за состојбите во партијата и дека одбила понуда да влезе во раководството во замена за молк.

Цели и ставови на Платформата

Андреј Петров потсети дека платформа никогаш нема да повика да се гласа против СДСМ, нема да бојкотира избори ниту ќе апстинира. Во своето обраќање, Ивановски рече: „СДСМ сега е заробена партија. И со статут и со политики. Зад нашата платформа не стои ниту еден бизнисмен којшто нѐ финансира. Наша е и автентична. Фундаментално, ние правиме дистинкција помеѓу раководството и членството на СДСМ. И ние сме СДСМ. Нема да бидеме нова политичка партија. Целта нѝ е да ги интегрираме сите здраворазумски луѓе во граѓанска, мултиетничка платформа за да биде успешна и да донесе промени во ова раководство на СДСМ. Сметаме дека тогаш опозицискиот фронт ќе биде во позиција да ја промени оваа власт. Потребна нѝ е промена на политиките“.

Поранешниот портпарол и член на раководните тела на СДСМ, Емилијан Станковиќ, остро го критикуваше претседателот Венко Филипче, тврдејќи дека тој не го претставува членството и дека ја зеле членската книшка пред да стане министер.

Актуелното партиско раководство возврати остро. За претседателот Филипче, луѓето кои бараат промени во партиските структури се платени од власта: „Ако тие луѓе имаат навистина добра намера и ако сакаат нешто да помогнат во оваа тешка опозициска битка – гледајте со каква арамиска банда имаме намера, нека се приклучат. Отворени им се вратите на партијата. Тоа се партиски членови. Не може да објаснат дека имаат добра намера, а не доаѓаат на отворена врата да дебатираме заедно и да ги споиме силите. Жалам што имаме информации во коишто нѝ се потрвдуваат сомнежите дека тие се платени од власта“, рече Филипче.

Филипче го обвини и поранешниот генерален секретар Никола Ќуркчиев, кој е дел од Платформата, дека фирмата која тој ја претставувал добила тендер од 1,6 милиони евра од државна фирма. Ќуркчиев одговори дека документот во којшто неговото име е наведено како овластен претставник е фалсификат и најави дека ќе поднесе кривична пријава за фалсификат и постапка за клевета.

Фото: прес-материјал од настанот