Орце Ѓорѓиевски: Фатен на лице место додека создаваше дива депонија во Кисела Вода

Инспекторите на Град Скопје доцна синоќа на терен затекнале лице кое фрлало градежен шут и кабаст отпад околу контејнерите во населбата Кисела Вода, создавајќи дива депонија.

Веднаш изречена санкција и планирано дополнително надгледување

Од градската управа соопштуваат дека инцидентот е веднаш санкциониран. Градоначалникот Орце Ѓорѓиевски порача дека додека екипите работат деноноќно за почист град, поединци го уништуваат сработеното и ја загадуваат околината.

"Истото е веќе санкционирано. Додека нашите екипи деноноќно работат за почист град, поединци го уништуваат сработеното и ја загадуваат околината во која сите живееме. Таквата неодговорност нема да помине без санкција. Јасно кажав и останувам на зборот - нулта толеранција за секој што ги претвора јавните површини во депонии и го загрозува здравјето на граѓаните," напиша Ѓорѓиевски.

Во објавата се додава дека инспекторите се на терен 24 часа, а во тек е постапка за поставување камери на јавни површини за побрзо откривање и санкционирање на прекршителите.

Во посебна порака на Фејсбук градоначалникот повика на одговорно однесување: "Скопје е наш заеднички дом. Да се однесуваме одговорно," пишува Ѓорѓиевски.

Фото: прес-материјал од настанот