Осудениот гинеколог Мухамед Асани треба да се јави во КПД-Струга на 20 септември 2026

Гинекологот и поранешен директор на Општата болница Струга, Мухамед Асани, кој во април правосилно беше осуден на казна затвор од три години, треба да се јави на издржување на казната во казнено-поправната установа од отворен вид во Струга на 20.09.2026 година, соопшти Управата за извршување на санкциите. Управата појасни дека судот му одобрил одлагање до 19.09.2026 година.

Апелациониот суд Битола ја одби неговата жалба и ја потврди пресудата за тешки дела против здравјето на луѓето. Во одлуката е потврдена и споредната санкција — пет години забрана за вршење на професија или дејност лекар.

Детали од случајот и исказот на пациентката

Според пресудата, случајот се однесува на настани од 27 август 2020 година, кога Асани, како лекар специјалист гинеколог во Општата болница Струга, постапил несовесно при третманот на Јалдз Веапоска. Судијата утврдил дека во постоперативниот период не биле преземени неопходни дијагностички постапки за утврдување на изворот на крвавењето.

Во својата прва изјава пред пет години, Веапоска го опиша искуството со операцијата и последиците:

-Само што се разбудив од операцијата, ме фатија големи стомачни болки. Ми рекоа немој да паничиш, ова не е ништо, ме боцнаа со инјекции против болка. Ме оставија така четири дена со болки. По неколку денови синот на директорот ми вели да се спремам да си одам дома. Јас му реков дека не разговара со некоја необразована жена, туку со медицинско лице и дека знам дека не сум добро.

Стомакот ми беше толку отечен, што бремена бев помала отколку откако се породив. Чувствував дека целото тело ме боли по операцијата. Одбив да одам дома, освен ако не сакаат со кревет да ме извадат од болницата. Дојде татко му, ми рече, оди дома ќе си јадеш топли супички, ќе ти помине. Му велам, докторе, не сум за дома. Анализите што ми ги направија утрото беа катастрофа. Крвта ми одеше надолу. Сепак, ме отпуштија и му реков на сопругот, дојди земи ме, носи ме некаде во Скопје, не сум за дома.

Дојде да ме земе маж ми, сестрите ми рекоа да си го спремам бебето, а јас не можев да стојам на нозе. Ми велат: Зошто глумиш? Во тој момент се покажа дека не глумам, затоа што паднав во шок, се тресев цела, пискав, плачев. Му се јавив на сопругот, барај доктор, му реков, јас умирам. Му рекле на сопругот дека ништо не ми било, тоа ми било од колкот. Откако паднав во шок, ме ставија во сала, ми извадија матка, бубрег, јајчник и ме пратија речиси умрена во Скопје. Не знаев ништо, подоцна разбрав на приватен преглед во „Систина“ дека имам еден јајчник. Можете да замислите каква бев – раскажа пред пет години Веапоска.

Поcelaцијата на судските вештаци покажа дека Асани не извршил ултразвучен преглед ниту компјутерска томографија на абдоменот и малата карлица со контраст, ниту пак гинеколошки вагинален преглед, процедури кои би помогнале да се утврди од каде доаѓа крвавењето и да се спречи развојот на хеморагичен шок. Кога бил извршен надолжен рез, иако крвавењето доаѓало од левата бубрежна артерија, тој ѝ ги отстранил матката, левиот јајчник и левиот јајцевод, иако тие органи не биле оштетени.

Поради понатамошното влошување и откриеноста на повредата на бубрежната артерија, другите хирурзи биле приморани да ѝ го отстранат и левиот бубрег за да ѝ го спасат животот. Апелациониот суд ја потврди вината за несовесно лекување, како и забраната за работа како лекар во траење од пет години.

Фото: прес-материјал од настанот