Почетна
Македонија

Отворен првиот клуб за лица со афазија во државата – „Надеж“

Клубот во Центарот за рехабилитација ќе им даде простор за повторно вклучување и размена на искуства на лицата со афазија.

·Македонија
Отворен првиот клуб за лица со афазија во државата – „Надеж“

Во Скопје денеска беше отворен првиот клуб за лица со афазија во државата, наречен „Надеж“, кој ќе служи како место за поддршка, дружење и социјализација за оние што го изгубиле или делумно го нарушиле говорот поради мозочен удар или други невролошки оштетувања.

Клубот работи во рамките на рехабилитацијата

Клубот е сместен во просториите на ЈЗУ Центар за рехабилитација на патологија на вербална комуникација при Клиничкиот центар во Скопје и е наменет за лица чија говорна и комуникативна способност е оштетена по повреда на мозокот.

„Ова ќе биде простор за нов почеток, каде што луѓето повторно ќе го пронајдат својот глас и ќе добијат шанса за поквалитетен живот“, изјави Ленка Угриновска, извршна директорка на Здружението за помош и поддршка на лицата со афазија „Хоуп“, на денешното отворање.

Организаторите наведуваат дека клубот ќе им овозможи на учесниците да се социјализираат, да разменуваат искуства и да почувствуваат дека имаат место каде што ќе бидат слушнати, разбрани и прифатени со достоинство. Како што посочија, иако нема официјални статистички податоци, здружението забележува сè поголем број на млади луѓе кои доживуваат мозочни удари и се соочуваат со афазија.

„За жал, лицата со афазија се невидливи во нашата држава“, рече таа, апелирајќи за поголема институционална поддршка и препознавање на потребите на оваа категорија граѓани.

Вработените во центарот очекуваат дека клубот ќе ја надополни клиничката терапија преку групни активности кои ја зајакнуваат комуникацијата, ќе го намалуваат социјалното изолирање и ќе создадат платформа за семејствата и грижните лица да разменуваат информации и искуства.

Фото: прес-материјал од настанот

Поврзани написи