Партиите поделиле речиси 9 милиони евра од буџетот; ВМРО‑ДПМНЕ доби 2,5 милиони

Партиите во земјата годинава поделиле речиси 9 милиони евра од државниот буџет за редовно партиско финансирање, а владејачката ВМРО‑ДПМНЕ доби рекордни 2,5 милиони евра.

Опозицискиот СДСМ се спушти на милион евра, додека ДУИ доби 472 илјади евра и го задржа третото место според висината на добиените средства.

Како се делат средствата

Анализата на документот за годинашните исплати, добиен од Министерството за правда, покажува дека трите најголеми партии заедно апсорбирале 45 проценти од вкупниот буџет наменет за партиско финансирање. Ако се вклучат и Левица и ЗНАМ, повеќе од половината од средствата во 2026 година отишле кај овие пет партии.

Втората петорка на листата ја сочинуваат партиите од албанскиот политички блок — БЕСА, Демократското движење, Алтернатива и Алијанса на Албанците — кои добиле меѓу 220 и 245 илјади евра. На крајот од таа група е Демократската партија на Турците, со нешто над 180 илјади евра.

Во системот на финансирање, работата на политичките партии се покрива од буџетот, а висината на средствата што ги добиваат зависи од изборните резултати. За оваа намена годинава беа издвоени речиси 9 милиони евра, односно 0,15 отсто од вкупните изворни приходи на буџетот.

Фото: Колаж