Петрушевски: На Филипче ВМРО-ДПМНЕ му е виновно за сè

Пратеникот Бране Петрушевски денеска на прес-конференција го обвина лидерот на СДСМ, Венко Филипче, дека „на Филипче ВМРО-ДПМНЕ му е виновно за сè“ и дека неговиот пристап на создавање паника и постојани критики ги одвлекува вниманието од управувањето со државата.

Според Петрушевски, Филипче го избира патот на нападот и хистеријата и со тоа се наоѓа на погрешен пат.

„На Филипче ВМРО-ДПМНЕ му е виновно за се, дури и за случувањата во неговата партијата. Ако на Филипче му е единствен начин на делување хистеријата што ја шири, ако се определил само за критика и напад кон се и сешто, дури и кон некогашни сопартијци, членови и носители во минатото на функции, тогаш навистина е на лош пат. ВМРО-ДПМНЕ како партија која сега ја предводи Владата може само да продолжи со грижа за граѓаните, а  Филипче добронамерно го советуваме – очајот и нападите да ги остави на страна. На Македонија и треба силна опозиција, а не како што е сега СДС, партија на која ВМРО-ДПМНЕ и е виновна за се“, рече Петрушевски.

Обвинувања за платформа и медиумска поддршка

Изјавите на Петрушевски следеа откако од СДСМ обвинија дека медиуми и новинари блиски до премиерот Христијан Мицкоски медиумски ја „спонзорираат“ платформата составена од актуелни и поранешни функционери на СДСМ, која тие ја нарекуваат „ЗНАМ 2.0“.

На брифингот во четвртокот, претставници на платформата — Гордан Георгиев, Андреј Петров, Славјанка Петровска, Игор Ивановски, Никола Куркчиев и Емилијан Станковиќ — изјавија дека нема да се трансформираат во нова политичка партија и нема да поднесуваат независни листи на парламентарните избори.

Тие посочија дека кај граѓаните постои опозициско расположение и дека целта е да се покренат разговори за обединување на опозицискиот фронт со цел победа над актуелната власт. Новата рунда разговори беше закажана за денеска во 12:05 часот.

Фото: прес-материјал од настанот