Пиротехника и солзавец пред парламентот во Приштина — шест полицајци повредени, тројца приведени

Синоќешниот протест пред зградата на парламентот во Приштина ескалираше во судир меѓу демонстрантите и полицијата откако дел од собраните се обидоа да ја блокираат излезната патека на пратениците додека не бидат усвоени измените на законот за Специјалниот суд.

Ескалација на плоштадот „Скендербег“

Демонстрантите, во еден момент, почнале да фрлаат пиротехнички средства кон зградата на парламентот и да палат контејнери за ѓубре на улиците околу објектот. Полицијата возврати со употреба на солзавец за да ја растера толпата и да им овозможи на пратениците и на службениците да ја напуштат оградата.

За време на судирите полицијата се соочи со фрлање стаклени шишиња и други предмети. Има пријавено материјална штета предизвикана од пиротехничките средства и од запалените контејнери.

Во текот на денот парламентот ги усвои измените на законот за Специјалниот суд во прво читање, но конечното гласање остана неизвесно. На средбата меѓу премиерот Албин Курти и лидерот на Демократската партија на Косово, Бедри Хамза, не е постигнат договор за продолжување на процедурата и преминување во второ читање.

ДПК обвини дека Курти го условил гласањето за амандманите во второ читање со претходно гласање за избор на претседател на Косово. Околу 19 часот, пратеници од партијата Самоопределување беа видени како ја напуштаат салата, додека ДПК ги повика да се вратат.

Косовската полиција попладнево соопшти дека шест полицајци се повредени, а 11 граѓани побарале медицинска помош. Тројца демонстранти се приведени и против нив ќе бидат преземени натамошни мерки во координација со судските органи. Подоцна вечерта протестот продолжи мирно на дел од плоштадот, додека полицијата задржа кордон пред зградата за да спречи повторна ескалација.

Фото: Принтскрин