Платформата за промени во СДСМ организира трибина „Што по 35 години?“
На 26 септември платформа од поранешни и актуелни функционери ќе дискутира за развојот од независноста и внатрепартиски реформи.
Платформата за промени во СДСМ ги носи темите меѓу граѓаните: на 26 септември ќе организира трибина насловена „Што по 35 години?“. Настанот ќе го модерира еден од водечките претставници на платформата, универзитетскиот професор Игор Ивановски.
Теми на трибината
Според поканата, на трибината ќе се разговара за политичкиот и општествениот развој од независноста до денес, а меѓу точките за дискусија се наведени:
- преиспитување на клучните предизвици од независноста до денес;
- направените грешки наспроти постигнатиот напредок;
- практикувањето на власта како парадигма за актуелната безнадежност;
- неопходните промени во политичкиот систем како услов за креирање нови и подобри политики;
- научените лекции од минатото и можните патишта за иднината;
- нов општествен договор како нужност за враќање на Македонија на стратешкиот колосек.
Во платформата учествуваат поранешни и актуелни функционери на СДСМ, меѓу кои пратеничката Славјанка Петровска, градоначалникот на Крива Паланка Сашко Митовски и лекарот Андреј Петров. Платформата бара итни промени во опозициската партија, вклучително и промена на актуелното раководство на чело со претседателот Венко Филипче.
Од нивните досегашни јавни настапи произлегува дека се залагаат за враќање на партијата кон членството и за позиционирање на СДСМ како посилен и поефикасен коректор на власта.
Од СДСМ, пак, порано изјавиле дека платформата претставува продолжение на политичката партија ЗНАМ, дека го следи истиот политички курс и дека нејзината цел е да ја ослаби опозициската СДСМ.
Фото: прес-материјал од настанот
