ПМ10 повторно над дозволеното: аларми во Скопје, Кичево, Тетово, Струмица и Кавадарци

Половина на ноември: мерните станици низ земјата веќе алармираат — ПМ10 честичките ги надминуваат дозволените граници во Скопје, Кичево, Тетово, Струмица и Кавадарци. Алармот доаѓа пред да започне вистинската зима, додека ланската сезона ни остави памет — над сто загадени денови во повеќе градови.

Реакции од експерти и граѓански организации

Град Скопје на јавна дебата го презентира новиот План за подобрување на квалитетот на воздухот, но без конкретни рокови кога воздухот ќе ги достигне европските стандарди. Стручната фела предупредува дека дел од мерките бараат време за реализација и за да дават ефект.

Граѓанските иницијативи истакнуваат сериозни пропусти: недоволна мрежа на мерни станици во општините и контрадикторни технички препораки за најголемите индустриски капацитети како „Усје“, каде што наместо проблематичните азотни оксиди се таргетирани други емисии.

Европската комисија забележува регулаторен пропуст — законите сè уште не се поддржани со потребните подзаконски акти за спроведување. Активистите предупредуваат дека без тие акти инспекциите и казните ќе останат ограничени.

Додека институциите пишуваат стратегии до 2030 година, граѓаните прашуваат што ќе дишеме денес и утре. Постојат повторни барања да се знае дали инспекциите ја завршија домашната задача и дали најголемите загадувачи ќе ги почитуваат правилата — или здравјето оваа зима ќе ни зависи од времето и ветрот.

АНКЕТА: Дали институциите ќе ги спречат најголемите загадувачи оваа зима? Да / Не

Фото: прес-материјал од настанот