По децении застој, „Свети Еразмо“ во Охрид ќе отвори ново крило до Нова година

По речиси една деценија застој, новото крило на Специјализираната болница за ортопедија и трауматологија „Свети Еразмо“ во Охрид влегува во завршна фаза и се очекува да биде ставено во употреба до Нова година. Инвестицијата ќе надмине два милиони евра и треба значително да ги прошири хируршките и терапевтските капацитети на болницата.

Со новото крило, болницата која во моментов располага со една и пол операциона сала ќе добие четири современи операциони сали, опремени со нова медицинска апаратура.

Проектот и опремувањето

„Се работи за еден огромен инвестициски циклус и довршување на заглавен проект во изминатите десетина години и пуштање во употреба на сосема нови операциони сали, комплетно опремени со нова опрема. Со тоа ќе придонесеме за значително подобрување на болничкиот стандард, условите за работа на колегите и подобрување на самото лекување“, вели Харалампие Шокаровски, директор на болницата.

Тој додава дека целта не е само завршување на објектот, туку создавање институција која ќе има значење и надвор од границите на земјата. „Ќе се потрудиме, меѓу другото, да станеме една можеби најреферентна институција од областа на ортопедијата и неврохирургијата. Вака како што го градиме патот, прво стручно, па потоа сега со заложби на Владата и со ваква поддршка каква што имаме, да станеме еден референтен центар во ортопедијата и во неврохирургијата“, додава директорот.

Според Шокаровски, инвестицијата не опфаќа само градежни работи, туку и набавка и монтажа на нова медицинска опрема за да се исполнат современите стандарди за болничко лекување. „Очекуваме наредниве месеци да завршиме со тој циклус и да имаме еден прекрасен здравствен објект, ултрамодерен, што ќе ги задоволува потребите покрај на пациентите во земјава, и на пациентите од регионите, од соседните држави, на пациенти кои гравитираат заради нашата патологија во нашава институција. И со тоа мислам да станеме еден поширок регионален центар од областиве на медицината коишто ги покриваме“, вели Шокаровски.

Министерот за здравство Сашо Клековски при неодамнешната посета соопшти дека е избран изведувачот кој треба да ги заврши градежните работи, а постапките за набавка на опремата се во различни фази. Клековски нагласи дека во само две години бројот на интервенции на колкови е зголемен за 40 проценти и дека „Свети Еразмо“ веќе е меѓу трите установи во земјава со најголем обем на такви интервенции, заедно со Клиничкиот центар во Скопје и скопската Градска општа болница „8 Септември“.

Новото крило е дел од инвестиција вредна над 2 милиони евра, во која се вклучени средства од Фондот за здравствено осигурување, буџетот на болницата, други државни институции и донации од општествено одговорни компании. Првичниот рок за завршување на објектот беше април 2017 година.

Фото: СДК.МК)