Почна првиот рок за упис на Универзитетот „Гоце Делчев“ во Штип

Почна првиот уписен рок за студенти во прва година на Универзитетот „Гоце Делчев“ (УГД) во Штип за академската 2026/2027 година. Уписот трае до 21 август, а кандидатите може да бираат меѓу 47 акредитирани студиски програми на 12 факултети и три академии.

Број на места и распоред на рокови

За новата академска година се предвидени вкупно 3.341 слободно место. Од нив 1.629 се наменети за редовни студенти, додека останатите се резервирани за вонредни студенти и студенти со кофинансирање. Проректорот за настава на УГД, Сашо Коцевски, истакна дека до универзитетот во изминатите денови пристигнале околу 1.000 електронски пријави.

„Самиот процес на аплицирање се одвива во две фази. Имено, кандидатите прво поднесуваат електронска апликација преку нашиот систем за електронски уписи, а потоа во вториот чекор ги носат своите документи во физичка форма и ги доставуваат на едно од уписните места на универзитетот коишто се лоцирани во Штип на Правниот факултет, имаме уписно место во Струмица, во Гевгелија, во Кавадарци и во Скопје“, вели Коцевски.

Тој посочи дека најголем интерес има за Факултетот за медицински науки. „Имаме голем интерес и за општествените науки, пред сè за Економскиот и за Правниот факултет, за Факултетот за туризам и бизнис логистика итн. Но интерес имаме и за техничките науки. Тука имаме најголем интерес за Факултетот за информатика, Факултетот за природни и технички науки, Земјоделскиот“, рече Коцевски.

За оние кандидати кои ќе ја пропуштат првата пријавна фаза, Универзитетот Гоце Делчев во Штип ќе организира втор и трет уписен рок — вториот на 3 и 4 септември и третиот на 16 и 17 септември.

За распоредот на постапките во првиот рок, Коцевски појасни: „За овој прв уписен рок, откако кандидатите ќе ги достават во физичка форма своите документи, а тоа треба да го направат до петок, 21 август, комисијата ќе направи нивна проверка и прегледување на нивните документи. На 26 август ќе се истакнат прелиминарните резултати. Оние кандидати кои што сметаат дека треба да поднесат приговори, тоа може да го направат на 27 август, а на 31 август Универзитетот ќе ги објави конечните ранг‑листи и ќе ги направи решенијата за прием. Самиот упис на кандидатите ќе се врши од 1 до 3 септември оваа година“, посочи Коцевски.

Фото: прес-материјал од настанот