Почнува општата дебата на 81. Генерално собрание на ОН

Општата дебата на 81-та сесија на Генералното собрание на ОН почнува од денеска и ќе трае до 28 септември, при што светските лидери ќе разговараат за глобалните предизвици и приоритети според темата „Обнова на довербата, управување со трансформацијата: Обединети нации што им служат на сите“.

Во седиштето на Организацијата во Њујорк во живо ќе присуствуваат околу 130 шефови на држави и влади за да ги упатат своите пораки. 81-та сесија, чиј почеток е на 8 септември, ја претседава Халилур Рахман од Бангладеш, кој беше избран за претседател на Генералното собрание во јуни и ќе ја отвори општата дебата.

Кој ќе зборува и редоследот

По воведното обраќање на Халилур Рахман, генералниот секретар на ОН, Антонио Гутереш, ќе го презентира својот извештај за работата на Организацијата. Во согласност со долгорочната пракса, Бразил е првата земја-членка што ќе зборува на општата дебата — традиција од 10-тата сесија во 1955 година, со исклучоци во 1983 и 1984 — и денеска тоа ќе биде претседателот Луиз Инасио Лула да Силва.

САД, како земја-домаќин, ја заземаат втората говорна позиција, а на собранието ќе им се обрати претседателот Доналд Трамп. Ватикан, Државата Палестина и Европската Унија се поканети да учествуваат во општата дебата.

На маргините на Генералното собрание украинскиот претседател Володимир Зеленски се сретна со францускиот претседател Емануел Макрон во Њујорк. Лидерите доаѓаат во услови на растечка загриженост поради неконтролирана вештачка интелигенција и нејзините ризици, како и климатските шокови и растот на цените кои веќе го тешат животот на стотици милиони луѓе.

Годишниот собир на високо ниво ќе се фокусира и на големите конфликти во Иран, Газа, Украина, Судан, Демократска Република Конго и Мјанмар, и на прашањето кое постојано се наметнува: Можат ли лидерите да сторат нешто за да ги окончаат?

Фото: прес-материјал од настанот