Polici i akuzuar se falsifikoi certifikata të dhurimit të gjakut për tu marrë pushim me pagesë

Është ngritur një kallëzim penal ndaj një efektivi policor të punësuar në Ministrinë e Punëve të Brendshme, i dyshuar se ka falsifikuar dy certifikata për dhurim gjaku dhe duke i përdorur ato ka marrë gjithsej gjashtë ditë pushim me pagesë.

Efektivi, i identifikuar me inicialet A.A., punon në Drejtorinë për Mbrojtjen e Personave dhe Objekteve të Caktuara. Sipas njoftimeve, ai hartoi dhe përdori dy certifikata të falsifikuara që pretendonin se kishte dhuruar gjak në Institutin e Mjekësisë së Transfuzionit në Qendrën Klinike "Nënë Tereza" në Shkup më 3 mars dhe 9 korrik të këtij viti, megjithëse nuk kishte dhuruar gjak në ato data.

Akuzat dhe procedura e brendshme

Bazuar në certifikatat e falsifikuara, A.A. parashtronte dy kërkesa për mungesë të paguar nga tri ditë pune secila. Sipas dosjes, mungesa e parë u përdor më 3, 4 dhe 5 mars, ndërsa e dyta më 9, 10 dhe 13 korrik të këtij viti.

Departamenti për Kontroll të Brendshëm, Hetime Kriminale dhe Standardet Profesionale në Ministrinë e Punëve të Brendshme ka dorëzuar një kallëzim penal kundër A.A. pranë Degës së Specializuar në Prokurorinë Themelore Publike për Ndjekjen e Krimit të Organizuar dhe Korrupsionit, për shkak të dyshimit për kryerje të veprës penale "falsifikim i dokumenteve", sipas nenit 378 të Kodit Penal.

Ministria njoftoi se do të propozojë edhe fillimin e procedurave disiplinore kundër efektivit për shkelje të rregullit dhe disiplinës së punës.

Foto: material shtypi nga ngjarja