Policia i identifikon pjesëmarrësit në rrahjen brutale në Gostivar

Policia i identifikoi pjesëmarrësit në rrahjen brutale në rrugë në Gostivar, pas publikimit të një materiali video në të cilin shihet një djalë që bie pasi goditet me shuplakë, e më pas sulmohet edhe me një shkop druri.

Bëhet fjalë për dy të mitur nga Gostivari dhe një 20-vjeçar nga Shkupi. Ngjarja, sipas informacioneve nga Ministria e Punëve të Brendshme, u denoncua të shtunën, ndërsa ndodhi gjatë natës midis së premtes dhe së shtunës rreth orës 02:30 në rrugën 'Borçe Jovanoski' në Gostivar.

Personat e dyshuar u identifikuan pas masave dhe veprimeve të ndërmarra nga punonjësit e policisë nga Stacioni policor i Gostivarit, sipas udhëzimeve të një prokurori publik.

Çfarë tregon xhirimi

Në xhirim shihet një djalë që bie pasi goditet me shuplakë në kokë, dhe më pas, edhe pse nuk lëviz, grupi vazhdon ta rrahë me një shkop druri i cili më vonë thyhet mbi shpinën e tij. Ngjarjen e ka denoncuar një 22-vjeçar nga Gostivari, i cili deklaroi se ai dhe shoku i tij u sulmuan nga tre persona të panjohur meshkuj që përdorën sende të forta dhe druri.

– Në stacionin policor, për një bisedë zyrtare, janë thirrur dy të mitur nga Gostivari, të cilëve, me urdhër të prokurorit publik, u janë sekuestruar dokumentet e udhëtimit. Personi i tretë është V.D. (20) nga Shkupi, për të cilin është dërguar një telegram te Drejtoria Rajonale e Policisë – Shkup për veprime të mëtejshme. Pas dokumentimit të plotë të rastit, gjatë ditës së nesërme, me procedurë të shpejtë, personat me kallëzim përkatës do të paraqiten para gjykatësit të procedurës paraprake, – njoftoi mbrëmë Ministria e Punëve të Brendshme.

Policia njoftoi se pas përfundimit të dokumentacionit do të parashtrohet kallëzim dhe do të ndërmerren masa të mëtejshme lidhur me paraqitjen para gjykatësit për procedurë paraprake.

Foto: Printskin