Popoviq: 22 ditë Gostivari piu ujë me feçe — këto janë 10 faktet për prokurorin Saveski

Katër javë pas helmimit masiv me ujë në Gostivar nuk është hapur asnjë procedurë, ndërsa prokuroria publike hesht edhe sot. Natasha Popoviq, anëtare e Këshillit Ekzekutiv të LSDM-së, u paraqit para mediave me një kronologji që e quajti "dosje me fakte" dhe me një adresim të drejtpërdrejtë ndaj prokurorit: "Kur Saveski të kthehet nga ekskursioni, të veprojë menjëherë."

Popoviq filloi me pranimin më të fundit të pushtetit. "Ministri i Shëndetësisë Klekovski më në fund foli. Pranoi se në ujin e Gostivarit kishte shumë bakterie dhe viruse të ndryshme", thotë ajo, duke e krahasuar me pretendimet e korrikut: "Ndërsa kryeministri Mickoski i bindte qytetarët se uji është teknikisht i sigurt." Pyetja kyçe, sipas saj, është si u bë kjo pa asnjë dokument të publikuar: "Nuk u publikua kurrë analiza, kush e nënshkroi, kush e lejoi."

Pikërisht mungesa e përgjegjësisë është thelbi i fjalimit të saj. "Kaluan katër javë dhe askush nuk përgjigjet për helmimin me ujë në Gostivar. Qytetarët presin. Dhe prokuroria vazhdon të heshtë. Deri kur?", pyeti Popoviq, duke shtuar komentin ironik që përcillet më shumë këtë mbrëmje: "Mos është edhe prokurori Saveski në ekskursion? Këto janë 10 fakte për prokurorin Saveski që të veprojë."

Kronologjia që paraqiti fillon shumë përpara rekomandimeve të parë zyrtare. Sipas Popoviqit, ndotja e ujit filloi më 25 qershor, ndërsa rastet e parë me simptoma helmimi u regjistruan më 13 korrik, me 100 dhe më pas 200 raste të reja në ditë. Pasuan pesë ditë në të cilat, siç thotë ajo, nuk reagoi askush dhe nuk u ndërmerr asgjë, ndërsa rekomandimet e parë u publikuan më 18 korrik.

Pjesa më e rëndë ka të bëjë me institucionin që duhej të mbronte publikun. Tri ditë përpara se të bëhej e ditur që uji është i ndotur, theksoi Popoviq, Centri i Shëndetit Publik në Tetovë nxori një raport se uji është i sigurt për të pirë. Rezultati i kësaj kronologjie është një numër që e shqiptoi ngadalë: "Domethënë 22 ditë qytetarët e Gostivarit helmoheshin me ujë të ndotur me feçe" — 4.700 qytetarë të helmuar.

Gjysma e dytë e "dosjes" është një radhë deklaratash që përjashtojnë njëra-tjetrën. Më 23 korrik kryeministri Mickoski lajmëroi ujë teknik për shfrytëzim, dhe deri në fund të së njëjtës javë edhe ujë të pijshëm. Pastaj, kujtoi Popoviq, ministri Toshkovski shpjegonte se bëhet hiperklorim dhe "u bë ekspert për analizën e ujit", për të deklaruar publikisht më 27 korrik se Gostivari kishte marrë ujë teknik që mund të shfrytëzohet për larje, por jo për të pirë. As atëherë, pretendon LSDM, nuk u publikua dokument apo analizë, e as emri i atij që aprovoi dhe nënshkroi.

Më 3 gusht, një javë të plotë pas deklaratës së Toshkovskit, drejtori Stojançe Angelov bëri të ditur se në ujin e Gostivarit kishte bakterie. "Si u thanë njerëzve që mund të shfrytëzojnë ujin teknik për të pirë dhe për larje, kur në të ka bakterie? Kaos dhe shpërbërje totale", thotë Popoviq. Zinxhiri u mbyll më 7 gusht, kur ministri Klekovski bëri të ditur se në ujë kishte shumë bakterie dhe viruse të ndryshme, ndonëse vetëm një javë më parë lajmëronte se uji së shpejti do të bëhej i pijshëm.

"Mijëra njerëz janë helmuar. Gati 5.000 njerëz përfunduan në spitale", thotë Popoviq, duke përfunduar me një mesazh që përgjegjësinë e vendos atje ku, sipas opozitës, ndodhet tani: "Saveskit i është gati çdo gjë, e kur të kthehet nga ekskursioni, ja ku e pret, të veprojë."

Foto: SDSM