Потврдени 64 жаришта на сипаници кај овците; угинати се околу 10.000

Во Северна Македонија се потврдени 64 жаришта на сипаници кај овците, а угинати се околу 10.000 животни, соопшти денеска министерот за земјоделство, шумарство и водостопанство Борче Серафимовски. Надлежните институции ја следат состојбата секојдневно и преземаат мерки за запирање на ширењето на болеста.

Каде се регистрирани жариштата и кои мерки се препорачуваат

На прес-конференција во Министерството, Серафимовски даде регионален пресек: 50 во Источниот регион, седум во Североисточниот, шест во Вардарскиот и едно во Скопскиот регион. Тој апелираше до сточарите да ги пријавуваат навремено сомнителните случаи и да ги почитуваат препораките од ветеринарните служби.

Министерот посочи дека следењето на епидемиолошката состојба покажало оти еден од главните ризици за пренесување на заразата е стрижењето на овците со ножици кои претходно не биле соодветно дезинфицирани. Затоа повторно побара сточарите да избегнуваат користење на заедничка опрема без претходна дезинфекција.

Серафимовски информираше дека институциите работат на обезбедување вакцини преку Европската комисија, Република Турција и Организацијата за храна и земјоделство на Обединетите нации (ФАО).

„Обезбедувањето вакцини нема автоматски да значи започнување на вакцинацијата. Одлуката ќе се темели на стручна проценка на епидемиолошката состојба, ризикот и можните ветеринарно-здравствени и економски последици од вакцинацијата,“ истакна Серафимовски.

Тој додаде дека сточарите чии стада се погодени ќе бидат обесштетени: во тек се проценките и подготовките за обезбедување средства за исплата, а моделот за обештетување е веќе утврден од Агенцијата за храна и ветеринарство. Министерството и Агенцијата остануваат во постојана комуникација и повторно ги повикаа сточарите строго да ги почитуваат сите пропишани мерки.

Фото: прес-материјал од настанот