Пожарот на островот Брач се смирува, евакуирани над 600 лица

Состојбата со големиот пожар на хрватскиот остров Брач, кој е активен од 10 септември, утрово е значително подобрена во споредба со претходните денови. Пожарникарите пријавуваат само помали жаришта со чад и пламен што се држат под контрола.

Над 600 евакуирани и засилена интервенција

За време на изминатата ноќ евакуирани се повеќе од 600 лица, а неколкумина побарале медицинска помош во Клиничкиот центар во Сплит. Основниот фронт во близина на Ложишќе и Милна е под интензивна полициска и противпожарна контрола.

Хрватските противпожарни служби соопштуваат дека во гаснењето се ангажирани 236 пожарникари со 68 возила, како и четири „канадер“ и три дополнителни авиони за гаснење пожари. Доброволците опишуваат дека почетокот бил драматичен и дека ситуацијата била „апокалиптична”.

Пожарот што избувна вчера попладне на Бол е изгаснат. Пожарникарите предупредуваат дека ако во следните денови не засилува ветерот, состојбата постепено ќе стивне.

Според проценките, огнената линија на Брач достигнала должина меѓу 35 и 40 километри, а досега изгореле повеќе од 4 000 хектари шума и ниска вегетација.

Во едно одморалиште ситуацијата била особено критична кога околу 200 лица останале привремено заробени во хотел. Поради пожарот што ја зафатил околината, тие биле сместени во најбезбедниот дел од објектот и заштитени додека екипите не обезбедиле нивна евакуација. Во близина на Севид, со помош на хеликоптер, пожарот бил ставен под контрола пред стемнување.

Фото: Принтскрин