Позната ТВ водителка Сара Калифа осудена на смрт во случај со шверц на дрога

Познатата телевизиска водителка Сара Калифа (39) и уште 11 лица беа осудени на смрт со бесење од суд во Каиро поради нивната вмешаност во еден од најголемите случаи на производство и шверц на синтетички дроги во земјата. Во судницата Калифа прими ја веста со солзи и силни молби до судијата за помилување.

Обвинението и запленетите докази

Според обвинителството, Калифа — која во јавноста беше препознатлива како водителка на емисијата „Невозможна мисија“, каде истражуваше теми од областа на криминалот и безбедноста — го водела организирано криминално здружување. Таа и нејзините соработници, како што стои во обвинението, биле вклучени во набавка на материјали за производство на синтетички дроги, нивна продажба и поседување нерегистрирано огнено оружје.

За време на полициската истрага, властите заплениле повеќе од 750 килограми наркотици и суровини и откриле два стана во Каиро кои служеле како импровизирани лаборатории.

Покрај телевизиската кариера, Калифа била и деловна жена — сопственичка на клиника за естетска хирургија и продукциска куќа за организација на настани. На социјалните мрежи ја следеле повеќе од 2,5 милиони луѓе, каде редовно споделувала детали од својот гламурозен живот.

Во судот таа го негираше обвинението и се обрати до судијата: „Ве молам, сослушајте ме, господине. Моите родители добро ме воспитаа, тие се луѓе кои се молат и мене не ми требаат пари од дрога.“ На социјалните мрежи таа исто така напишала: „Никогаш во животот немам запалено цигара. Се колнам во Бога, невина сум.“

Во овој процес биле опфатени вкупно 28 обвинети: судот изрекол 12 пресуди на смрт, девет доживотни казни, додека седум лица биле ослободени од обвиненијата. Судската одлука за смртна казна била донесена по консултација со Великиот муфтија.

Пресудата не е конечна — правниот тим на Калифа има право на жалба до Касацискиот суд. Инаку, во друга постапка таа и неколку соработници биле претходно осудени на три години затвор за киднапирање и напад врз нејзиниот личен возач, за што полицијата пронашла и видеоснимка во нејзиниот телефон.

Фото: прес-материјал од настанот