Предвремени избори или мандат до крај – партиите со различни позиции, уставните измени остануваат неизвесни

Партиите во земјата се поделени дали да оди на предвремени парламентарни избори или да го заврши мандатот до крај со фокус на реформи и евроинтеграции. Владата тврди дека претпочита редовни избори, но вели дека нема да бега од предвремени доколку опозицијата ја покрие таа иницијатива.

Надмудрувања и меѓупартиски обвинувања

Во политичкиот судир, СДСМ го обвини премиерот дека бара избори поради празен буџет и заостанати резултати и долгови на власта. Претседателот на СДСМ, Венко Филипче, остро го нападна премиерот во својата јавна изјава.

„Очигледно е дека единствениот параметар што него го тера да бара избори е тоа што повеќе нема пари во буџетот за неговите криминални тендери. Сега нема ни од каде да се задолжува така лесно, затоа што неговиот ментор Орбан веќе не е на власт, нема од каде да зема кинески пари. Не се изолираме. Напротив, ние сме лидери во рамките на движењето и фронтот за вистина и правда. Не се изолираме. И избори ќе има, ќе се соочиме на изборите кога и да бидат, дали догодина или за две години“, порача Венко Филипче, претседател на СДСМ.

По овие пораки, некои опозициски партии најавија дека се подготвени за предвремени избори. ДУИ побара распуштање на Собранието, а Левица изјави дека ја прифаќа идејата за избори и повика на обединување за општествени промени. Од СДСМ возвратија дека обединувањето може да биде само околу јасни проевропски политики и ги прозваа Левица да се откажат од проруските политики.

ВМРО‑ДПМНЕ пак го впери прстот кон СДСМ и неговиот лидер: „Единствен човек во државата кој не сака избори и бега од нив е Венко Филипче и талогот од СДС. Од месечината се гледа дека јасно му е и на него и на талогот, каков дебакл ќе доживеат и како ќе бидат поразени од граѓаните“, беше одговорот од ВМРО‑ДПМНЕ.

Политичките аналитичари проценуваат дека владата најверојатно ќе се обиде да го извлече мандатот до крај. Во тој амбиент, динамиката околу уставните измени останува неизвесна — преговорите најавено ќе продолжат, но многумина сомневаат дека може брзо да се дојде до согласност.

„Опозицијата секогаш треба да бара избори, во секој момент, бидејќи секогаш се обидува тоа да го искористи за да има подобар резултат на следните парламентарни. Во оваа ситуација малку е нејасно, бидејќи дел од опозиционите политички партии сакаат да има предвремени парламентарни избори, а ред други политички партии не сакаат. И тоа исто е и во власта. ВЛЕН не се спремни за предвремени парламентарни избори, додека ВМРО‑ДПМНЕ секогаш ги бара истите, бидејќи таа е спремна. Јас мислам дека во многу брзо време не ќе може да се решат уставните измени, така што и владата не би ризикувала во краен период да ги прави тие уставни измени, а особено не под бугарски диктат“, смета политичкиот аналитичар Љуљзим Фаризи.

Фото: прес-материјал од настанот